தமிழ்நாட்டின் சில பகுதிகளில் அடுத்த 2 நாட்களுக்கு கனமழை பெய்ய வாய்ப்பு உள்ளதாக சென்னை வானிலை மையம் (RMC) தெரிவித்துள்ளது. குறிப்பாக நீலகிரி, கன்னியாகுமரி மாவட்டங்களிலும், கோவை மற்றும் நெல்லை மாவட்டங்களின் மலைப்பகுதிகளிலும் கனமழை சாத்தியம் என கூறப்பட்டுள்ளது.
கடந்த 24 மணி நேரத்தில் தமிழகத்தில் ஓரிரு இடங்களில் மழை பதிவாகியுள்ளதாகவும், அதிகபட்சமாக கன்னியாகுமரி மாவட்டம் நெய்யூரில் 9.35 செ.மீ. மழை பதிவானதாகவும் வானிலை மையம் தெரிவித்தது.
வானிலை மாற்றத்திற்கு காரணமாக, சுமார் 1.5 கி.மீ. உயரத்தில் மத்திய மேற்கு மற்றும் அதனை ஒட்டிய கடலோர ஆந்திரப் பகுதிகளின் மேல் ஒரு வளிமண்டல சுழற்சியும், சுமார் 3.12 கி.மீ. உயரத்தில் தெற்கு ஆந்திரா மற்றும் அதனை ஒட்டிய பகுதிகளின் மேல் மற்றொரு வளிமண்டல சுழற்சியும் நிலவுவதாக அறிவிக்கப்பட்டுள்ளது.
இன்று, சென்னை, செங்கல்பட்டு, காஞ்சிபுரம், திருவள்ளூர், ராணிப்பேட்டை, வேலூர், திருப்பத்தூர், திருவண்ணாமலை, சேலம், தர்மபுரி, கிருஷ்ணகிரி, விழுப்புரம், கள்ளக்குறிச்சி, கடலூர் மாவட்டங்களில் ஓரிரு இடங்களிலும் புதுச்சேரி பகுதிகளிலும் இடி மின்னலுடன் மிதமான மழை பெய்யக்கூடும். மேலும் நீலகிரி, கன்னியாகுமரி மாவட்டங்களிலும், கோவை-நெல்லை மலைப்பகுதிகளிலும் ஓரிரு இடங்களில் இடி மின்னல் மற்றும் காற்றுடன் கனமழை பெய்ய வாய்ப்பு உள்ளது.
நாளை, சென்னை, செங்கல்பட்டு, காஞ்சிபுரம், வேலூர், திருப்பத்தூர், திருவண்ணாமலை, சேலம், தர்மபுரி, கிருஷ்ணகிரி, விழுப்புரம், கள்ளக்குறிச்சி, கடலூர், தேனி, தென்காசி மாவட்டங்களில் ஓரிரு இடங்களிலும் புதுச்சேரியிலும் இடி மின்னலுடன் மிதமான மழை எதிர்பார்க்கப்படுகிறது. நீலகிரி, கன்னியாகுமரி, ராணிப்பேட்டை, திருவள்ளூர் மாவட்டங்களிலும், நெல்லை-கோவை மலைப்பகுதிகளிலும் ஓரிரு இடங்களில் இடி மின்னல் மற்றும் பலத்த காற்றுடன் கனமழை பெய்யக்கூடும். சென்னையில் வானம் பொதுவாக மேகமூட்டமாக இருந்து, நகரின் சில பகுதிகளில் லேசான முதல் மிதமான மழை பெய்ய வாய்ப்பு உள்ளது; அதிகபட்ச வெப்பநிலை 35–36°C, குறைந்தபட்சம் 28–29°C அளவில் இருக்கக்கூடும்.
