கிறிஸ்டோபர் நோலன் இயக்கத்தில் உருவாகும் தி ஒடிஸி திரைப்படத்துக்கான இந்திய முன்பதிவுகள் ஐமேக்ஸ் திரைகளில் பெரும் வரவேற்பை பெற்றுள்ளன. உயர்ந்த கட்டணத்தையும் பொருட்படுத்தாமல் பல காட்சிகள் ஹவுஸ்புல் நிலைக்கு சென்றுள்ளன.
இந்த படம் ஜூலை 17 அன்று வெளியாக உள்ளது. முழு நீளமும் ஐமேக்ஸ் கேமராக்களிலேயே படமாக்கப்பட்ட முதல் திரைப்படம் என கூறப்படுவதால் எதிர்பார்ப்பு அதிகரித்துள்ளது.
வெளியீட்டிற்கு இன்னும் சுமார் ஐந்து வாரங்கள் இருக்கும் நிலையில், ஜூன் 8 அன்று தேர்ந்தெடுக்கப்பட்ட ஐமேக்ஸ் திரைகளுக்கான முன்பதிவு தொடங்கியது. மும்பை, டெல்லி போன்ற மெட்ரோ நகரங்களில் சில டிக்கெட்டுகள் அதிகபட்சமாக ரூ.3,300 வரை விற்கப்பட்டன.
மும்பையில் பீனிக்ஸ் பல்லேடியம் மாலில் உள்ள பிவிஆர் ஐகானில் ரூ.3,300 விலை டிக்கெட்டுகள் ஏற்கனவே விற்றுத் தீர்ந்ததாக தெரிவிக்கப்பட்டுள்ளது. வடாலா மிராஜ் சினிமாஸின் ஐமேக்ஸ் திரையில் ரூ.1,800 அளவில் டிக்கெட்டுகள் விற்பனையில் உள்ளன.
டெல்லி மற்றும் சுற்றுவட்டாரப் பகுதிகளில் உள்ள பிவிஆர் ஐமேக்ஸ் திரைகளில் ரூ.2,100 முதல் ரூ.2,400 வரை டிக்கெட் விலை நிர்ணயிக்கப்பட்டுள்ளது. முதல் இரண்டு நாட்களுக்கான டிக்கெட்டுகள் விற்றுத் தீர்ந்துள்ள நிலையில், வார இறுதி காட்சிகளும் வேகமாக நிரம்பி வருவதால், இந்திய ஐமேக்ஸ் திரைகளில் படம் பிரமாண்ட தொடக்கத்தை பெறும் சூழல் உருவாகியுள்ளது.
