தஞ்சாவூர் மாவட்டம் கும்பகோணத்தில் செய்தியாளர்களிடம் பேசிய இந்து மக்கள் கட்சி தலைவர் அர்ஜூன் சம்பத், காங்கிரஸ் கட்சி “முதுகில் குத்தும்” கட்சி என குற்றம்சாட்டி, முதல்வர் விஜய் அதனால் ஏமாறக்கூடாது என்று எச்சரித்தார்.
முன்னைய “திராவிட மாடல்” அரசு மத்திய அரசுடன் மோதல் போக்கை கடைபிடித்ததால் தமிழகத்தின் பல வளர்ச்சி திட்டங்கள் தடைபட்டதாக அவர் கூறினார். மத்திய அரசுடன் இணக்கமாக செயல்படுவோம் என முதல்வர் விஜய் தெரிவித்ததை வரவேற்றாலும், நிதி ஆயோக் கூட்டத்தில் பழைய நிலைப்பாடுகளையே மீண்டும் கூறியதாகவும் விமர்சித்தார்.
நீட் விலக்கு தொடர்பான கோரிக்கையை நிதி ஆயோக் கூட்டத்தில் அல்ல, உச்சநீதிமன்றத்தில் தான் முன்வைக்க வேண்டும் என அவர் தெரிவித்தார். மேலும் “பிரசாத ஸ்டால்” விவகாரத்தில் அறநிலைத்துறை அமைச்சரின் நடவடிக்கையை பாராட்டிய அவர், ஒப்பந்தங்களுடன் தொடர்புடைய சுமார் இரண்டு லட்சம் பேரின் வாழ்வாதாரத்தை கருத்தில் கொண்டு முடிவெடுக்க வேண்டும் என்றார்.
காவிரி பிரச்னை மற்றும் மேகதாது விவகாரங்களை சுட்டிக்காட்டிய சம்பத், இதற்குக் காரணமாக காங்கிரஸை குற்றம்சாட்டினார். சோனியா காந்தி, கர்நாடக முதல்வர் டி.கே. சிவகுமார் உள்ளிட்டோர் “இந்து விரோத” போக்கை கடைபிடிப்பதாகவும் கூறினார். காவிரி விவகாரத்தில் மோடி அரசு அரசியல் செய்யவில்லை என்றும், வாஜ்பாய் ஆட்சிக் காலத்தில் காவிரி ஆணையம் அமைக்கப்பட்டதாகவும் அவர் குறிப்பிட்டார்.
காவிரி, இலங்கை தமிழர் பிரச்னை போன்ற தமிழக நலன்களுக்கு எதிரான விஷயங்களில் காங்கிரஸ் இருந்ததாக கூறிய அவர், தி.மு.க. மற்றும் தமிழக வெற்றிக்கழகம் காங்கிரஸால் வஞ்சிக்கப்படக்கூடாது என்றார். மேலும் விஜய் அரசுக்கு ஆறு மாதம் வாய்ப்பு கொடுக்க வேண்டும் என கூறிய அவர், 2028 மகாமக திருவிழாவுக்கான பூர்வாங்க பணிகளை இப்போதே தொடங்க வேண்டும் என்றும், அந்த தேசிய திருவிழாவில் பிரதமர் நரேந்திர மோடி பங்கேற்க வேண்டும் என்றும் தெரிவித்தார்.
