கோவையில் சுற்றுச்சூழல் ஆர்வலர்கள், ஒருமுறை மட்டுமே பயன்படுத்தப்படும் பிளாஸ்டிக் பொருட்கள் மீண்டும் பரவலாக பயன்படுத்தப்படுவதாகக் கூறி, தடையை கடுமையாக அமல்படுத்தி நீர்நிலைகளை பாதுகாக்க தமிழக அரசு நடவடிக்கை எடுக்க வேண்டும் என கோரிக்கை வைத்துள்ளனர்.
அவர்கள் கூறுகையில், அ.தி.மு.க. ஆட்சிக் காலத்தில் கடைகளில் அதிரடி சோதனைகள் நடத்தி தடை செய்யப்பட்ட பொருட்களை பறிமுதல் செய்து அபராதம் விதித்ததால், பிளாஸ்டிக் பயன்பாடு ஓரளவு கட்டுப்படுத்தப்பட்டது. அந்த நேரத்தில் ‘டாஸ்மாக் பார்’களிலும் இவற்றைப் பயன்படுத்த தயக்கம் இருந்ததாகவும் தெரிவித்தனர்.
ஆனால் தி.மு.க. ஆட்சியில் பிளாஸ்டிக் பயன்பாடு மீண்டும் அதிகரித்ததாக அவர்கள் குற்றம்சாட்டினர். ‘மீண்டும் மஞ்சள் பை’ திட்டத்தில் ரூ.10க்கு பைகள் விற்பனை செய்யப்பட்டதும், சில இடங்களில் தானியங்கி இயந்திரங்கள் வைக்கப்பட்டதும் குறிப்பிடப்பட்டாலும், பராமரிப்பு இல்லாமல் அவை முடங்கியதால் திட்டம் பெரும்பாலும் விளம்பரத்திற்கே சுருங்கியதாக அவர்கள் கூறினர்.
நடவடிக்கை தளர்ந்ததால் உணவு பார்சல்களுக்கு பிளாஸ்டிக் கவர் பயன்படுத்துவது வழக்கமாகி விட்டதாகவும், பயன்படுத்தி வீசப்படும் கழிவுகள் சாக்கடை கால்வாய்களிலும் நீர்நிலைகளிலும் தேங்கி மாசுபாட்டை ஏற்படுத்துவதாகவும் அவர்கள் தெரிவித்தனர். அத்தியாவசிய தேவையற்ற பிளாஸ்டிக் பொருட்கள் உற்பத்தி, விற்பனை, பயன்பாட்டைத் தடை செய்யும் உத்தரவை மீண்டும் அமல்படுத்தி, மீறுபவர்களின் தொழில் உரிமத்தை ரத்து செய்ய வேண்டும் என்றும் வலியுறுத்தினர்.
கவுசிகா நீர் கரங்கள் அமைப்பு நிறுவனர் செல்வராஜ், அத்தியாவசிய தேவையைத் தவிர மற்ற பயன்பாட்டுக்கான பிளாஸ்டிக் உற்பத்தியைத் தடுக்க வேண்டும்; மாற்றுப் பொருட்களை நடைமுறைப்படுத்தி மக்களிடம் அரசு விழிப்புணர்வு ஏற்படுத்த வேண்டும் என தெரிவித்தார்.
