இந்தியாவின் முன்னணி ஸ்டார்ட்அப் நிறுவனங்களையும் கண்டுபிடிப்பாளர்களையும் உலகிற்கு காட்சிப்படுத்த பிரான்ஸை இந்தியா தேர்வு செய்தது “மிகப்பெரிய கவுரவம்” என பிரான்ஸ் அதிபர் இமானுவேல் மேக்ரான் தெரிவித்தார். நீஸ் நகரில் பிரதமர் நரேந்திர மோடியின் பயணத்தின் போது அவர் இதை கூறினார்.
பிரான்ஸ் மற்றும் ஸ்லோவாக்கியா நாடுகளுக்கான ஐந்து நாள் பயணத்தின் முதல் கட்டமாக பிரதமர் மோடி நீஸ் நகரை வந்தடைந்தார். அங்கு அவருக்கு உற்சாக வரவேற்பு அளிக்கப்பட்ட நிலையில், பின்னர் அவர் அதிபர் மேக்ரானை சந்தித்தார்; மேக்ரான் கைகுலுக்கியும் கட்டியணைத்தும் அன்புடன் வரவேற்றார்.
இதனைத் தொடர்ந்து, பிரான்ஸ் மற்றும் பிற நாடுகளைச் சேர்ந்த முன்னணி புதுமை சார்ந்த ஸ்டார்ட்அப் நிறுவனங்கள் மற்றும் மூலதன நிதியங்களை ஒன்றிணைக்கும் ‘பாரத் இன்னோவேட்ஸ்’ நிகழ்வை இருநாட்டு தலைவர்களும் இணைந்து தொடங்கி வைத்தனர். தொடக்கத்திற்கு முன் முதலீட்டாளர்களுடன் பிரதமர் மோடி கலந்துரையாடியதாகவும் தெரிவிக்கப்பட்டது.
தொடக்க நிகழ்ச்சியில் பேசிய மேக்ரான், இந்தியாவிற்கு வெளியே முதன்முறையாக நடைபெறும் ‘பாரத் இன்னோவேட்ஸ்’ நிகழ்வை தொடங்குவதிலும், பிரதமர் மோடியை நீஸ் நகரில் வரவேற்பதிலும் பெருமை அடைவதாக கூறினார். சில மாதங்களுக்கு முன்பு மும்பையில் பிரான்ஸ்–இந்தியா புத்தாக்க ஆண்டை தொடங்கி வைத்ததையும் அவர் நினைவூட்டினார்.
இந்தியா புதுமைகளை உருவாக்குகிறதா என்பதே இனி கேள்வி அல்ல; இந்தியாவுடன் இணைந்து யார் புதுமைகளை உருவாக்கப் போகிறார்கள் என்பதே கேள்வி என மேக்ரான் கூறினார். மேலும், சுதந்திரத்திற்குப் பிந்தைய இந்தியாவின் மிக நீண்ட காலம் பணியாற்றிய பிரதமர் என்ற பெருமையை மோடி பெற்றதற்கு வாழ்த்து தெரிவித்த அவர், அது உறுதியான செயல்பாடுகளையும் தலைமைத்துவத்தையும் காட்டுகிறது என்றார்.
