அறங்காவலர் பதவி காலியாக உள்ள கோவில்களில் ஆன்மிக சிந்தனை கொண்டவர்களை அறங்காவலர்களாக நியமிக்க வேண்டும் என்று ஹிந்து முன்னணி கோரிக்கை விடுத்துள்ளது.
ஹிந்து முன்னணி தலைவர் காடேஸ்வரா சுப்ரமணியம் வெளியிட்ட அறிக்கையில், அறநிலையத்துறையின் கீழ் உள்ள 214 கோவில்களில் பரம்பரை வழி சாரா அறங்காவலர்கள் நியமிக்கப்பட உள்ளதாக தெரிவிக்கப்பட்டுள்ளதாக குறிப்பிட்டார். கோவில் திருப்பணிகள், நிதிநிலை மற்றும் அடிப்படை வசதிகளை முறையாக கவனிக்கும் திறன் கொண்டவர்களாக அறங்காவலர்கள் இருக்க வேண்டும் என்றும் அவர் கூறினார்.
பல கோவில்களில் கடவுள் நம்பிக்கை இல்லாத நாத்திகர்கள் நியமிக்கப்படுவதாகவும், அவர்களுக்கு கோவில் மரபுகள் மற்றும் பூஜை முறைகள் குறித்த தெளிவு இருக்காமல் போகலாம் என்றும் அறிக்கை குற்றம்சாட்டியது. எந்தவித பாகுபாடும் இன்றி, லஞ்சத்தை புறந்தள்ளி நியமனங்கள் செய்யப்பட வேண்டும் எனவும் வலியுறுத்தப்பட்டது.
மேலும், நாத்திகவாதிகள், குற்றப்பின்னணி கொண்டவர்கள் மற்றும் நல்ல பழக்க வழக்கங்கள் இல்லாதவர்களை நிச்சயமாக நியமிக்கக் கூடாது என கூறப்பட்டது. கோவில்கள் கலாசார மையங்கள் என்பதால், கலாசார மரபுகளை உணர்ந்து சமுதாய சேவை பணிகளில் ஈடுபடுபவர்களை அறங்காவலர்களாக நியமிக்க வேண்டும் என்றும் அறிக்கையில் தெரிவிக்கப்பட்டுள்ளது.
