அமெரிக்காவின் புகழ்பெற்ற டைம் இதழ் வெளியிட்டுள்ள 2026 ஆம் ஆண்டுக்கான ‘விளையாட்டுத் துறையில் செல்வாக்கு மிகுந்த 100 பேர்’ பட்டியலில் இந்திய கிரிக்கெட் வீராங்கனை ஸ்மிருதி மந்தனா (29) இடம்பெற்றுள்ளார். இந்த ஆண்டு உலகளாவிய பட்டியலில் இடம் பெற்ற ஒரே இந்தியர் என்ற பெருமையும் அவருக்குக் கிடைத்துள்ளது.
டைம் 100 என்பது அரசியல், கலை, வணிகம், அறிவியல், சமூக சேவை, விளையாட்டு உள்ளிட்ட துறைகளில் உலகளவில் தாக்கத்தை ஏற்படுத்தும் நபர்களை ஆண்டுதோறும் அங்கீகரிக்கும் பட்டியலாகும். தற்போது வெளியான விளையாட்டுக்கான சிறப்பு பட்டியல், இன்றைய விளையாட்டுத் துறையை வடிவமைக்கும் வீரர்களை முன்னிறுத்துகிறது.
மும்பையில் பிறந்த தொடக்க ஆட்டக்காரரான மந்தனா, மகளிர் கிரிக்கெட்டில் குறிப்பிடத்தக்க சாதனைகளைப் பெற்றுள்ளார். உள்ளூர் ஒருநாள் போட்டியில் இரட்டை சதம் அடித்த முதல் இந்திய வீராங்கனை என்ற பெருமையுடன், மகளிர் சர்வதேச கிரிக்கெட்டில் 17 சதங்களுடன் அதிக சதங்கள் பட்டியலில் இணை உரிமையாளராகவும் உள்ளார்.
ஒரே ஆண்டில் மகளிர் ஒருநாள் சர்வதேச போட்டிகளில் 1,000க்கும் மேற்பட்ட ரன்கள் எடுத்த முதல் வீராங்கனை என்ற சாதனையையும் அவர் பெற்றார். மேலும் 2024 மற்றும் 2026 ஆண்டுகளில் ராயல் சேலஞ்சர்ஸ் பெங்களூரு அணியை வழிநடத்தி மகளிர் பிரீமியர் லீக் பட்டங்களை வென்றார். கடந்த ஆண்டு இந்தியா ஐசிசி மகளிர் ஒருநாள் உலகக் கோப்பையை வென்றபோது துணைத் தலைவராக செயல்பட்டு, அந்தத் தொடரில் இரண்டாவது அதிக ரன்கள் எடுத்த வீராங்கனையாகவும் திகழ்ந்தார்.
இந்த ஆண்டுப் பட்டியலில் கூடைப்பந்து நட்சத்திரம் லெப்ரான் ஜேம்ஸ் முக்கிய முகமாக இடம் பெற்றுள்ளார். அவருடன் லியோனல் மெஸ்ஸி, கிறிஸ்டியானோ ரொனால்டோ, டென்னிஸ் வீரர் கார்லோஸ் அல்காரஸ், கோல்ப் வீரர் ரோரி மெக்ல்ராய், பனிச்சறுக்கு வீராங்கனை எய்லீன், தென் ஆப்ரிக்க கேப்டன் டெம்பா பவுமா மற்றும் நியூயார்க் நிக்ஸ் அணியின் ஜேலன் பிரன்சன் உள்ளிட்டோரும் பட்டியலில் இடம்பெற்றுள்ளனர்.
