ராமநாதபுரம் மாவட்டம் பரமக்குடி வட்டார போக்குவரத்து அலுவலகத்தில் (ஆர்.டி.ஓ.) லஞ்ச ஒழிப்பு போலீசார் திடீர் சோதனை நடத்தி, வாகன ஆய்வாளர் ஜி-பே மூலம் லஞ்சம் பெற்றதாக குற்றச்சாட்டு எழுந்துள்ளது.
அலுவலகம் பரமக்குடி–முதுகுளத்தூர் சாலையில் செயல்படுகிறது. தணிக்கை செய்ய தேவையான இடவசதி இல்லாததால், சில பணிகள் ஐ.டி.ஐ. வளாகத்தில் நடைபெறுவதாக தெரிவிக்கப்பட்டுள்ளது. அங்கு நேற்று முன்தினம் மதியம் 3 மணியளவில் டி.எஸ்.பி. ராமச்சந்திரன் தலைமையில் சோதனை நடைபெற்றது.
சோதனை நேரத்தில் புரோக்கர்கள் மற்றும் டிரைவிங் ஸ்கூல் ஊழியர்கள் தப்பிச் செல்ல முயன்றதாகவும், அவர்களை பிடித்து விசாரித்ததாகவும் போலீசார் தெரிவித்தனர். வாகன ஆய்வாளர் தங்கராஜ் (59) உள்ளிட்டோரிடம் நடந்த சோதனையில் கணக்கில் வராத ரூ.1,92,650 இருப்பது கண்டறியப்பட்டதாக கூறப்படுகிறது.
மேலும் புரோக்கர்களின் செல்போன்களை ஆய்வு செய்ததில், வாகன ஆய்வாளரின் உறவினர்களின் வங்கி கணக்குகளுக்கு ஜி-பே மூலம் சுமார் ரூ.5 லட்சம் பண பரிமாற்றம் நடந்ததற்கான தகவல்கள் கிடைத்ததாக தெரிவிக்கப்பட்டது. இதையடுத்து தங்கராஜ், புரோக்கர்கள் உள்ளிட்ட 15 பேர் மீது வழக்கு பதிவு செய்யப்பட்டுள்ளது.
