சென்னை: தமிழகத்தில் புதிதாக அமைக்கப்பட்டு உற்பத்திக்கு தயாராக உள்ள சூரியசக்தி மற்றும் காற்றாலை மின் நிலையங்களை துணை மின் நிலையத்துடன் இணைக்க தேவையான ஒப்புதலை மின் வாரியம் மாதக்கணக்கில் வழங்கவில்லை என முதலீட்டாளர்கள் குற்றம்சாட்டுகின்றனர். இதனால் பல திட்டங்கள் செயல்படாமல் முடங்கியுள்ளதாக அவர்கள் தெரிவிக்கின்றனர்.
மாநிலத்தில் தனியார் நிறுவனங்கள் பெரும் முதலீட்டில் புதுப்பிக்கத்தக்க மின் நிலையங்களை அமைத்து வருகின்றன. ஜூன் 1 முதல் உள்நாட்டில் தயாரிக்கப்பட்ட சோலார் செல், சோலார் பேனல் பயன்படுத்த வேண்டும் என்ற மத்திய அரசின் விதி மற்றும் ஏற்கனவே பணிகளை தொடங்கியவர்களுக்கு விலக்கு என்ற அறிவிப்பு காரணமாக, பலரும் பணிகளை வேகப்படுத்தியதாக கூறப்படுகிறது.
முதலீட்டாளர்களின் தகவலின்படி, 226 நிறுவனங்கள் அமைத்த 736.50 மெகாவாட் திறன் கொண்ட சூரிய மின் திட்டங்களும், நான்கு நிறுவனங்கள் அமைத்த 400 மெகாவாட் திறன் கொண்ட காற்றாலை திட்டங்களும் தற்போது தயார்நிலையில் உள்ளன. ஆனால் கடந்த மாதம் துணை மின் நிலைய இணைப்புக்கான ஒப்புதலை வழங்க வேண்டாம் என உத்தரவு பிறப்பிக்கப்பட்டதாகவும், அது திரும்ப பெறப்படாததால் இணைப்பு அனுமதி கிடைக்கவில்லை என்றும் அவர்கள் கூறுகின்றனர்.
மார்ச் 16 முதல் இணைப்பு அனுமதி வழங்கப்படாததால், வங்கிக் கடனில் முதலீடு செய்தவர்கள் தவணை செலுத்த முடியாமல் நெருக்கடியில் சிக்கியுள்ளதாக முதலீட்டாளர்கள் தெரிவிக்கின்றனர். மேலும், மரபுசாரா மின்சார பிரிவில் தலைமை பொறியாளராக இருந்த சந்திரசேகர் சஸ்பெண்ட் செய்யப்பட்டதன் பின்னர் அதிகாரிகளிடம் பயம் ஏற்பட்டதால் ஆய்வு, அனுமதி போன்ற பணிகள் தாமதமாகின்றன என்றும் அவர்கள் குற்றம்சாட்டுகின்றனர்.
தாமதமின்றி துணை மின் நிலைய இணைப்புக்கு அனுமதி வழங்க வேண்டும்; புதுப்பிக்கத்தக்க மின்சாரத் துறையில் உள்ள நடைமுறை சிக்கல்களை பேசி தீர்க்க குழு அமைக்க வேண்டும்; பல இடங்களில் பழுதான டிரான்ஸ்பார்மர்களை மாற்றி நிறுவ வேண்டும் என்றும் அவர்கள் கோரிக்கை விடுத்துள்ளனர். மேலும், தொடர்புடைய தொழில் துறையினர் மற்றும் உற்பத்தியாளர்கள் சங்க நிர்வாகிகளை மின் துறை அமைச்சர் நேரில் அழைத்து பேச்சு நடத்த வேண்டும் என்றும் கேட்டுள்ளனர்.
