திருப்பரங்குன்றம் தொடர்பான வழக்கில் உச்சநீதிமன்றத்தில் மேல்முறையீடு தாக்கல் செய்துள்ளதாக தமிழக அரசு மதுரை உயர்நீதிமன்ற கிளையில் தெரிவித்துள்ளது.
மதுரை மாவட்டத்தைச் சேர்ந்த எழுமலை ராம ரவிக்குமார் உள்ளிட்டோர் தாக்கல் செய்த மனுவின் அடிப்படையில், 2025 டிசம்பர் 1 அன்று நீதிபதி ஜி.ஆர். சுவாமிநாதன், வழக்கமான இடங்களைத் தவிர திருப்பரங்குன்றம் மலையின் தீபத் தூணிலும் கார்த்திகை தீபம் ஏற்ற வேண்டும் என உத்தரவிட்டிருந்தார்.
அந்த உத்தரவை நிறைவேற்றவில்லை எனக் கூறி நீதிமன்ற அவமதிப்பு வழக்கு தொடரப்பட்ட நிலையில், அவமதிப்பு வழக்கில் பிறப்பிக்கப்பட்ட உத்தரவுகளை எதிர்த்து மேல்முறையீட்டு மனுக்கள் தாக்கல் செய்யப்பட்டன. இதற்கிடையில், தமிழக அரசு தனது நிலைப்பாட்டை தெரிவிக்க மதுரை கிளை முன்பே உத்தரவிட்டிருந்தது.
இந்த வழக்கு ஜூன் 22 அன்று நீதிபதிகள் சதீஷ்குமார் மற்றும் ஜோதி ராமன் அமர்வில் மீண்டும் விசாரணைக்கு வந்தபோது, தீபம் ஏற்ற வேண்டும் என பிறப்பித்த உத்தரவுக்கு எதிராக உச்சநீதிமன்றத்தில் மேல்முறையீடு செய்துள்ளதாக அரசு தரப்பு தெரிவித்தது. இதையடுத்து, விசாரணையை நீதிபதிகள் ஒத்திவைத்தனர்.
