ஆட்சி மாற்றத்துக்குப் பிறகு அரசு துறைகளில் டெண்டர் நடவடிக்கைகள் கடுமையாக கண்காணிக்கப்படும் சூழலில், தமிழக வீட்டுவசதி வாரியம் 10 நாட்களில் 75 டெண்டர் அறிவிப்புகளை வெளியிட்டுள்ளது.
கிடைத்த தகவலின்படி, ஜூன் 9 முதல் ஜூன் 19 வரை இந்த டெண்டர்கள் கோரப்பட்டுள்ளன. குறிப்பாக ஜூன் 19 அன்று மட்டும் 22 டெண்டர் அறிவிப்புகள் வெளியானதாகவும், இந்த திடீர் அதிகரிப்பு உயரதிகாரிகளை ஆச்சரியப்படுத்தியதாகவும் கூறப்படுகிறது.
இதற்கு முன் பொதுப்பணித்துறை, நீர்வளத்துறை, நகராட்சி நிர்வாகம் உள்ளிட்ட துறைகளில் புதிய அரசின் நடைமுறைகள் முழுமையாக தொடங்குவதற்கு முன்பே அதிக எண்ணிக்கையில் டெண்டர்கள் கோரப்பட்டதாக விமர்சனம் எழுந்தது. அதனைத் தொடர்ந்து குறுகிய காலத்தில் வெளியான டெண்டர் அறிவிப்புகளை ரத்து செய்ய அரசு உத்தரவிட்டதுடன், முறையான கோப்பு நடைமுறைகள் முடிந்து அரசின் அனுமதி பெற்ற பிறகே டெண்டர்கள் கோர வேண்டும் என அறிவுறுத்தியிருந்தது.
வீட்டுவசதி வாரிய அதிகாரி ஒருவர் கூறுகையில், பல்வேறு பணிகளுக்காக மார்ச் முதல் வாரத்தில் டெண்டர்கள் கோரப்பட்டிருந்தாலும், தேர்தல் நடத்தை விதிகள் அமலுக்கு வந்ததால் பணிகள் பாதியிலேயே நிறுத்தப்பட்டன என்றார். தற்போது தற்காலிக பணியாளர்கள் வழங்கல், பழைய குடியிருப்புகள் பராமரிப்பு போன்ற பணிகளுக்கே டெண்டர்கள் கோரப்பட்டுள்ளன; புதிய கட்டுமான திட்டங்கள் தொடர்பான பணிகள் இல்லை என்றும் அவர் தெரிவித்தார்.
இதற்கிடையில், குறுகிய காலத்தில் அதிக எண்ணிக்கையில் டெண்டர்கள் வெளியானது குறித்து உயரதிகாரிகள் விசாரித்து வருவதாக தகவல் வெளியாகியுள்ளது.
