சென்னை: மணல் மற்றும் கல் குவாரிகளை முறைகேடுகள் இன்றி இயக்கி அரசுக்கு வருவாய் ஈட்டும் வகையில், செயல்முறை திட்ட அறிக்கை தயாரித்து வழங்குமாறு தமிழக அரசு சம்பந்தப்பட்ட அதிகாரிகளுக்கு உத்தரவிட்டுள்ளது.
தமிழகத்தில் பாலாறு, தாமிரபரணி, காவிரி, கொசஸ்தலை, ஆரணியாறு, வெள்ளாறு உள்ளிட்ட பல ஆறுகளில் மணல் வளம் உள்ளது. முந்தைய ஆட்சிகளில் மணல் விற்பனையை அரசு மேற்கொள்ளும் என அறிவிக்கப்பட்டதுடன் இணையதளமும் உருவாக்கப்பட்டிருந்தது. ஆனால் குவாரிகளில் மணல் அள்ளுதல், கிடங்குகளுக்கு எடுத்துச் செல்லுதல் போன்ற பணிகள் தனியார் ஒப்பந்த நிறுவனங்களிடம் ஒப்படைக்கப்பட்டதாகவும், 2021ல் தி.மு.க. அரசு பொறுப்பேற்ற பின்னும் இதே நடைமுறை தொடர்ந்ததாகவும் தகவல் கூறுகிறது.
இதன் விளைவாக பல குவாரிகளில் அனுமதிக்கப்பட்ட அளவை மீறி மணல் எடுத்து விற்பனை செய்யப்பட்டதாகவும், அரசுக்கு கிடைக்க வேண்டிய பல நூறு கோடி ரூபாய் வருவாய் ஆளும் கட்சியினருக்கும் அதிகாரிகளுக்கும் கைமாறியதாகவும் குற்றச்சாட்டு எழுந்தது. இதுதொடர்பாக சென்னை, திருச்சி, கரூர், புதுக்கோட்டை, நாமக்கல், திண்டுக்கல் உள்ளிட்ட மாவட்டங்களில் குவாரி ஒப்பந்ததாரர்களுடன் தொடர்புடைய இடங்களில் அமலாக்கத்துறை சோதனை நடத்தி ஆவணங்கள், ரொக்கம், நகைகள் பறிமுதல் செய்ததாகவும், சம்பந்தப்பட்ட வழக்கு உச்ச நீதிமன்றத்தில் நிலுவையில் இருப்பதாகவும் தெரிவிக்கப்பட்டுள்ளது.
இந்தப் பிரச்னை காரணமாக தி.மு.க. அரசு குவாரிகளை திறக்காமல் மூடி வைத்ததாக கூறப்படுகிறது. தற்போது த.வெ.க. அரசு பொறுப்பேற்ற நிலையில், முறைகேடாக இயங்கிய கல் குவாரிகளுக்கு மூடுவிழா நடத்தப்பட்டதாகவும், மீண்டும் மணல் மற்றும் கல் குவாரிகளை படிப்படியாக திறப்பது குறித்து அரசு பரிசீலிப்பதாகவும் தகவல் வெளியாகியுள்ளது.
நீர்வளத்துறை அதிகாரி ஒருவர் கூறுகையில், தனியார் ஒப்பந்ததாரர்களிடம் பணிகளை ஒப்படைத்ததே முறைகேடுகளுக்கு காரணம் என தெரிவித்தார். இந்த முறை கமிஷன் இல்லாமல் குவாரிகளை இயக்கி அரசுக்கு வருவாய் ஈட்ட வேண்டும் என முதல்வர் விஜய் உத்தரவிட்டுள்ளதாகவும், குவாரிகளை எப்படி இயக்குவது, தேவையான இயந்திரங்கள் மற்றும் லாரிகளை வாங்கலாமா அல்லது வாடகைக்கு எடுக்கலாமா, அதற்கான செலவுகள் உள்ளிட்ட விவரங்களை அறிக்கையாக தயாரிக்க உத்தரவிடப்பட்டுள்ளதாகவும் கூறினார். அறிக்கை விரைவில் முதல்வரிடம் சமர்ப்பிக்கப்படும்; அதன் பின்னர் குவாரிகள் படிப்படியாக திறக்கப்படலாம் என்றார்.
