சென்னை: கமிஷன் தொகைக்காக சைபர் குற்றவாளிகள் தங்களின் வங்கி கணக்குகளை பயன்படுத்த அனுமதிப்பவர்கள் மீது வழக்குப்பதிவு செய்யப்படும் என தமிழ்நாடு காவல் துறை பொதுமக்களுக்கு எச்சரிக்கை விடுத்துள்ளது.
இந்த எச்சரிக்கை, ராமநாதபுரம் மாவட்டத்தின் சத்திரக்குடி, பரமக்குடி பகுதிகளில் செயல்பட்டதாக கூறப்படும் ஏழு பேர் கொண்ட சர்வதேச சைபர் குற்றக் கும்பல் கைது செய்யப்பட்டதைத் தொடர்ந்து வெளியானது. அந்தக் கும்பல் ஆன்லைன் வழியாக சுமார் ரூ.100 கோடி மோசடி செய்து, அதை கிரிப்டோ கரன்சியாக மாற்றி வெளிநாடுகளில் உள்ள கூட்டாளிகளுக்கு அனுப்பியதாக போலீசார் தெரிவித்தனர்.
தொடர் விசாரணையில், பொதுமக்களின் வங்கி கணக்குகளை கமிஷன் கொடுத்து பயன்படுத்தி ஆன்லைன் பண மோசடிகளை நடத்தியது தெரிய வந்ததாக அதிகாரிகள் கூறினர். மேலும், இதேபோன்ற செயல்களில் சில போலீசாரும் ஈடுபட்டிருந்ததை விசாரணை அதிகாரிகள் கண்டறிந்ததாகவும் தெரிவிக்கப்பட்டது.
இதையடுத்து டிஜிபி அலுவலகம் மாவட்ட எஸ்பிகளுக்கு அவசர சுற்றறிக்கை அனுப்பி, கணக்குகளை பயன்படுத்த அனுமதிப்போர் மீது வழக்குப்பதிவு செய்து சட்டப்படி மேல்நடவடிக்கை எடுக்க உத்தரவிட்டுள்ளது. இந்த தகவலை அனைத்து தரப்பு மக்களுக்கும் தெரியப்படுத்தவும், காவல் துறை வாட்ஸாப் குழுக்களில் ஆடியோ பதிவுகள் மூலம் விழிப்புணர்வு ஏற்படுத்தவும் அறிவுறுத்தப்பட்டுள்ளது.
இதற்கிடையில், முதியோரின் வங்கி கணக்குகளை குறிவைத்து மோசடி கும்பல்கள் செயல்படுவதாக ரிசர்வ் பேங்க் ஆப் இந்தியாவும் எச்சரிக்கை விடுத்துள்ளதாக காவல் துறை குறிப்பிட்டுள்ளது.
