பிரிட்டனில் 2024 ஜூலையில் நடந்த பொதுத்தேர்தலில் தொழிலாளர் கட்சி வெற்றி பெற்று ஆட்சி அமைத்தது. அதன் பின்னர் பிரதமராக பொறுப்பேற்ற கீர் ஸ்டார்மர் (63), உட்கட்சியில் ஏற்பட்ட அதிருப்தியை காரணமாகக் காட்டி பதவியிலிருந்து விலகுவதாக அறிவித்துள்ளார். தொழிலாளர் கட்சியின் புதிய தலைவர் தேர்வு செய்யப்பட்டவுடன் அவர் விரைவில் பிரதமராக பதவியேற்பார் என கூறப்படுகிறது.
அதே நேரத்தில், லண்டனில் 10 டவுனிங் வீதியில் உள்ள பிரதமரின் அதிகாரபூர்வ இல்லத்தில் ஒரு ‘நிலையான’ குடியிருப்பாளர் இருக்கிறார்—லேரி என்ற பூனை. டேவிட் கேமரூன் பிரதமராக இருந்த காலத்தில் ஊழியர்கள் கொண்டு வந்த இந்த பூனை, கடந்த 19 ஆண்டுகளாக அங்கேயே தங்கி வருகிறது.
லேரிக்கு ‘சீப் மவுசர்’ (தலைமை எலி பிடிப்பவர்) என்ற பட்டமும் வழங்கி, பிரதமர் இல்ல ஊழியர்கள் சிறப்பாக பராமரித்து வருகின்றனர். பிரதமர்கள் மாறினாலும், ஊழியர்களின் பராமரிப்பில் இருக்கும் லேரிக்கு எந்த மாற்றமும் இல்லை என்பதே அங்குள்ளவர்களின் கருத்து.
இல்லத்தின் பல பகுதிகளிலும் சுதந்திரமாகச் சுற்றித்திரியும் லேரி, அங்கு வரும் உலகத் தலைவர்கள், அரசு அதிகாரிகள், பத்திரிகையாளர்கள் எடுக்கும் படங்கள் மற்றும் வீடியோக்களிலும் அடிக்கடி இடம்பெறுகிறது. டேவிட் கேமரூன், தெரசா மே, போரிஸ் ஜான்சன், லிஸ் ட்ரஸ், ரிஷி சுனக், தற்போது ஸ்டார்மர் என ஆறு பிரதமர்களை பார்த்த லேரி, அடுத்த பிரதமரின் வருகைக்காக ‘காத்திருக்கிறது’ என ஊழியர்கள் நகைச்சுவையாக சொல்கிறார்கள்.
பல புகைப்படங்கள், வீடியோக்கள் வெளியானதால் லேரி சமூக வலைதளங்களிலும் பிரபலமாகி விட்டது. இதற்கென தனிப்பட்ட சமூக வலைதளப் பக்கமும் உள்ளது; அதை சுமார் 9 லட்சம் பேர் பின்தொடர்கின்றனர். ஸ்டார்மரின் ராஜினாமா அறிவிப்பைத் தொடர்ந்து, “என் தலைமை பணியாளர் ஸ்டார்மரின் ராஜினாமாவை ஏற்றுக் கொண்டேன்” என்ற கேலியான பதிவு வைரலாகி வருகிறது.
