அதிமுக பொதுச்செயலாளர் எடப்பாடி கே. பழனிசாமி திமுக மீது முன்புபோல் கடுமையாக விமர்சனம் செய்யாமல் இருப்பது, கட்சிக்குள் சலசலப்பை உருவாக்கியுள்ளதாக சில நிர்வாகிகள் தெரிவித்துள்ளனர்.
தமிழக அரசியலில் பல தசாப்தங்களாக திமுகவும் அதிமுகவும் மாறிமாறி ஆட்சிக்கு வந்த நிலையில், இரு தரப்பும் ஒருவரை ஒருவர் தீவிரமாக விமர்சித்து வந்தனர். ஆனால், தமிழக வெற்றிக் கழகம் (த.வெ.க.) ஆட்சிக்கு வந்த பிறகு அந்த தாக்குதல் போக்கு மாறியுள்ளதாக அவர்கள் கூறினர்.
சட்டம்-ஒழுங்கு, பாலியல் குற்றங்கள், மின்வெட்டு போன்ற பிரச்னைகளில் த.வெ.க. அரசை பழனிசாமி கடுமையாக சாடும் அறிக்கைகள் வெளியிடுகிறார். அதே நேரத்தில், முந்தைய ஆட்சியாளரான திமுகவை அவர் பெரும்பாலும் சுட்டிக்காட்டாமல் விடுவதாகவும், இன்றைய சில பிரச்னைகளுக்கு முந்தைய திமுக அரசும் ஒரு வகையில் காரணம் எனவும் அவர்கள் வாதிட்டனர்.
மேகதாது அணை தொடர்பாக சட்டசபையில் நிறைவேற்றப்பட்ட தீர்மானத்தில் திருத்தம் கொண்டு வர காரணமாக இருந்தது திமுகதான் என்றும், அந்த இடைச்செருகலை எதிர்த்து பேசும்போதும் பழனிசாமி திமுகவை விமர்சிக்கவில்லை என்றும் நிர்வாகிகள் குறிப்பிட்டனர்.
மேலும், சமீபத்தில் வெளியான அவரது அறிக்கைகளில் திமுக பெயர் பெரும்பாலும் இடம்பெறவில்லை என்றும், அறிக்கை தயாரிப்போருக்கு த.வெ.க. மீது மட்டும் விமர்சனம் போதுமென ‘கறார்’ உத்தரவு இருப்பதாகவும் அவர்கள் கூறினர். முன்னாள் அமைச்சர் சி.வி. சண்முகம் முன்வைக்கும் ‘திமுகவுடன் கூட்டணி முயற்சி’ குற்றச்சாட்டுக்கு இது வலுவூட்டும் போல் இருப்பதாகவும், திமுக எதிர்ப்பை கைவிடுவது அதிமுகவுக்கு அரசியல் ரீதியாக நல்லதல்ல என்றும் அவர்கள் எச்சரித்தனர்.
