தமிழக பதிவு சட்டத்தில் பிரிவு 34-சி சேர்க்கப்பட்ட சட்டத் திருத்தம் அரசியலமைப்புக்கு முரணானது எனக் கூறி, மதுரை கிளை உயர்நீதிமன்றம் அதை ரத்து செய்துள்ளது. கொடைக்கானலைச் சேர்ந்த மனோஜ்குமார் துகார் உள்ளிட்டோர் மற்றும் அகில இந்திய ரியல் எஸ்டேட் சங்கங்களின் கூட்டமைப்பு தாக்கல் செய்த மனுக்களில் நீதிபதிகள் என்.சதீஷ்குமார், எம்.ஜோதிராமன் அமர்வு இந்த உத்தரவை பிறப்பித்தது.
பிரிவு 34-சி என்பது நீதிமன்றங்களால் ஏற்கனவே ரத்து செய்யப்பட்ட பழைய விதிகளின் மறுவடிவமே என அமர்வு குறிப்பிட்டது. உயர்நீதிமன்றம் மற்றும் உச்சநீதிமன்றம் அரசியலமைப்புக்கு முரணானவை என அறிவித்த விதிகளை மீண்டும் அறிமுகப்படுத்தும் முயற்சியாக இந்தத் திருத்தம் இருப்பதாகவும் நீதிமன்றம் தெரிவித்தது.
அதிகாரப் பகிர்வு கோட்பாட்டை மீறுதல் மற்றும் சொத்து பரிமாற்ற சட்டம் தொடர்பான முக்கிய விதிகளை மீறுதல் உள்ளிட்ட காரணங்களால், இந்தத் திருத்தங்கள் மாநிலத்தின் அதிகார வரம்புக்கு அப்பாற்பட்டவை என்றும் அரசியலமைப்புக்கு முரணானவை என்றும் கூறப்பட்டது. மேலும், ஒருவரின் சொத்தை கையாளும் உரிமைக்கு நியாயமற்ற கட்டுப்பாடுகளை விதிப்பதாகவும், சொத்துரிமை அரசியலமைப்பின் கீழ் உரிமையாகவும் மனித உரிமையாகவும் அங்கீகரிக்கப்பட்டுள்ளதாகவும் நீதிமன்றம் சுட்டிக்காட்டியது.
விற்பனை ஒப்பந்தங்கள் உள்ளிட்ட ஆவணங்களை பதிவு செய்வது கட்டாயமாக்கப்பட்டுள்ள நிலையில், மோசடிகளைத் தடுக்கும் வகையில் சில பரிந்துரைகளையும் நீதிமன்றம் முன்வைத்தது. முந்தைய மற்றும் தற்போதைய வில்லங்கங்கள் குறித்த துல்லியமான தகவல்களை வழங்கினால், அப்பாவியான வாங்குபவர்களின் நலன் பாதுகாக்கப்படும் என்றும், சொத்து பரிமாற்ற சட்டத்தின் பிரிவு 55-ன் கீழ் வாங்குபவர்கள் தேவையான கவனம், அக்கறையை செலுத்த உதவும் என்றும் தெரிவித்தது.
மேலும், சொத்து தொடர்பான பரிவர்த்தனையில் ஈடுபட விரும்புவோருக்கு அந்தச் சொத்தின் தற்போதைய அல்லது முந்தைய வில்லங்கங்கள் குறித்து தெரிவிக்கப்படுவதை உறுதி செய்ய வேண்டும் என கூறியது. சர்வே எண், கதவு எண் வாரியாக வில்லங்கங்களின் விரிவான பட்டியலை பதிவுத்துறை ஐ.ஜி. வெளியிட வேண்டும் என்றும், அனைத்து சார்பதிவாளர் அலுவலகங்களிலும் உடனடியாக பணியைத் தொடங்கி குறிப்பிட்ட காலவரம்புக்குள் படிப்படியாக நிறைவு செய்ய வேண்டும் என்றும், வில்லங்க பதிவேட்டில் அனைத்து சர்வே எண் விவரங்களும் இடம் பெறுவதையும் பதிவுகளின் துல்லியத்தையும் சரிபார்க்க வேண்டும் என்றும் அமர்வு அறிவுறுத்தியது.
