மதுரை: அரசு போக்குவரத்து கழக பஸ்களின் முகப்பு பகுதியில் முன்பு நீக்கப்பட்டிருந்த ‘தமிழ்நாடு’ என்ற வார்த்தை, தற்போது அரசு உத்தரவின்படி இயற்கை எரிவாயு (சி.என்.ஜி.) மூலம் இயங்கும் அரசு பஸ்களில் மீண்டும் இடம்பெற்றுள்ளது.
தமிழகத்தில் எட்டு அரசு போக்குவரத்து கழகங்கள் உள்ளன. சென்னை மாநகர போக்குவரத்து கழகம் மற்றும் அரசு விரைவு போக்குவரத்து கழகம் தவிர, மற்ற ஆறு கழகங்களின் பஸ்களில் வழக்கமாக முகப்பில் ‘தமிழ்நாடு அரசு போக்குவரத்து கழகம்’ என்ற பெயர் இடம் பெற்றிருந்ததாக தெரிவிக்கப்படுகிறது.
தி.மு.க. ஆட்சிக்காலத்தில் ‘தமிழ்நாடு’ என்ற வார்த்தை நீக்கப்பட்டு, அரசு போக்குவரத்து கழகம் என்றே குறிப்பிடப்பட்டதாகவும், பல தரப்பினர் எதிர்ப்பு தெரிவித்தபோதும் அந்த மாற்றம் தொடர்ந்ததாகவும் கூறப்படுகிறது.
போக்குவரத்து கழக அதிகாரிகள் கூறுகையில், கடந்த வாரம் அரசு சி.என்.ஜி. பஸ்களில் ‘தமிழ்நாடு’ என்ற வார்த்தையை சேர்க்க அரசு உத்தரவிட்டதாகவும், பிற அரசு பஸ்களிலும் இதைச் சேர்ப்பது குறித்து இன்னும் உத்தரவு வரவில்லை என்றும் தெரிவித்தனர்.
தொழிற்சங்க நிர்வாகிகள் இந்த நடவடிக்கையை வரவேற்றதுடன், அனைத்து போக்குவரத்து கழக பஸ்களிலும் ‘தமிழ்நாடு’ பெயரை மீண்டும் சேர்க்க வேண்டும் என்றும், வெளிமாநிலங்களுக்கு செல்லும் பஸ்களுக்கு தனி அடையாளம் கிடைத்து குழப்பம் குறையும் என்றும் தெரிவித்தனர்.
