சென்னை: திமுக ஆட்சிக்காலத்தில் 32 அரசு துறைகளில் “வசூல்” நடந்ததாகவும், அதனை உதயநிதி ஸ்டாலின் மற்றும் அவரது உறவினர் சபரீசன் ஆகியோருக்கு தலா 16 துறைகள் எனப் பிரித்து சரிபாதியாகப் பகிர்ந்ததாகவும் அமைச்சர் ஆதவ் குற்றம்சாட்டினார்.
சென்னையில் செய்தியாளர்களிடம் பேசிய அவர், சம்பந்தப்பட்ட அமைச்சர்கள் வசூலித்த தொகையை கொண்டு சென்று வழங்கியதாகவும் கூறினார். சட்டசபையில் மக்களுக்கான பிரச்னைகளை எதிர்க்கட்சி எழுப்பும் போது, அதற்கு ஆளுங்கட்சி எப்படி பதிலளிக்கிறது என்பதும் பொதுமக்களுக்கு தெரிய வேண்டும் என வலியுறுத்தினார்.
மேலும், ஊடகங்களில் ஆளுங்கட்சியின் கருத்துகள் மட்டுமே அதிகமாக வெளிவருவதையும், எதிர்க்கட்சிகளின் பேச்சுகள் போதிய அளவில் வெளியிடப்படுவதில்லை என்பதையும் அவர் விமர்சித்தார். சட்டசபை நிகழ்வுகள் பொதுமக்களுக்கு வெளிப்படையாக சென்றடைய வேண்டும் என்றார்.
துறைகள் வாரியாக ஊழலுக்கான திட்டம் இருப்பதாக கூறிய ஆதவ், பள்ளிக்கல்வித்துறையில் தனியார் பள்ளிகளின் உரிமம் புதுப்பிப்பதற்காக ஒவ்வொரு பள்ளியிடமிருந்தும் ரூ.25 லட்சம் பெறப்பட்டதாகவும் குற்றம்சாட்டினார். மேலும், ஸ்டாலின் தூண்டுதலின் பேரில் திமுக நிர்வாகிகள் அவதூறு பேசுவதாகவும், கூட்டணி கட்சிகளை பலவீனப்படுத்த முயற்சி நடப்பதாகவும் அரசியல் குற்றச்சாட்டுகளை முன்வைத்தார்.
