புதுடில்லி: வினாத்தாள் கசிவு சம்பவங்களைத் தடுக்கும் வகையில் அடுத்த ஆண்டு முதல் அரசு பெரிய சீர்திருத்தங்களை மேற்கொள்ள இருப்பதாக மத்திய கல்வித்துறை அமைச்சர் தர்மேந்திர பிரதான் தெரிவித்தார்.
நீட் தேர்வில் வினாத்தாள் கசிவு குறித்த புகார்களுக்கு பின்னர் நடத்தப்பட்ட மறுதேர்வை குறிப்பிட்டு, 38 நாட்களுக்குள் மறுதேர்வை வெற்றிகரமாக நடத்த உதவிய அரசு அமைப்புகள், ஆசிரியர்கள், அதிகாரிகள் மற்றும் இந்திய விமானப்படையை அவர் பாராட்டினார். மறுதேர்வு ஏற்பாடுகளில் சுமார் இரண்டரை லட்சம் பேர் ஈடுபட்டதாகவும் கூறினார்.
கசிவுகளைத் தடுக்க கடுமையான நேரடி மற்றும் டிஜிட்டல் கண்காணிப்பு மேற்கொள்ளப்பட்டதாக அவர் தெரிவித்தார். வினாத்தாள்களின் பாதுகாப்பை உறுதி செய்ய, நாடு முழுவதும் உள்ள 5,440 தேர்வு மையங்களுக்கு மறுதேர்வு வினாத்தாள்களை கொண்டு செல்ல இந்திய விமானப்படை பயன்படுத்தப்பட்டதாகவும் கூறினார்.
மே மாதத்தில் நடந்த நீட் தேர்வில், பாதுகாவலர்களாக இருக்க வேண்டிய ஆசிரியர்களில் ஒரு பகுதி குற்றச்செயலில் ஈடுபட்டதால் வினாத்தாள் கசிவு ஏற்பட்டதாக பிரதான் கூறினார். இதில் தொடர்புடைய ஆசிரியர்கள் மீது கடுமையான சட்ட நடவடிக்கை எடுக்க சிபிஐக்கு உத்தரவிடப்பட்டுள்ளதாகவும், அவர்களின் சொத்துகளும் பறிமுதல் செய்யப்படும் என்றும் தெரிவித்தார்.
மனிதத் தலையீட்டை குறைத்து, வினா வங்கிகளின் ரகசியத்தன்மையை பாதுகாக்கும் நோக்கில், அடுத்த ஆண்டு முதல் நீட் தேர்வு கணினி வழித் தேர்வு முறையில் நடத்தப்படும் என அவர் கூறினார்.
