ஒட்டாவா: உலகக்கோப்பை கால்பந்து போட்டியின் குரூப் ‘பி’ லீக் ஆட்டங்களில் ஸ்விட்சர்லாந்து மற்றும் போஸ்னியா வெற்றிகளை பதிவு செய்தன. கனடாவை 2-1 என்ற கணக்கில் வீழ்த்திய ஸ்விட்சர்லாந்து, பி பிரிவில் முதலிடம் பிடித்து அடுத்த சுற்றுக்கு தகுதி பெற்றது.
கனடா–ஸ்விட்சர்லாந்து மோதலில் முதல் பாதியில் இரு அணிகளும் கோல் வாய்ப்புகளை உருவாக்கினாலும் கோல் கிடைக்கவில்லை. இரண்டாம் பாதி தொடங்கியதும் 46வது நிமிடத்தில் ரூபன் வர்காஸ் ஸ்விட்சர்லாந்துக்காக முதல் கோலை அடித்தார்; 57வது நிமிடத்தில் ஜோஹான் மன்சாம்பி மேலும் ஒரு கோல் சேர்த்து முன்னிலையை வலுப்படுத்தினார்.
76வது நிமிடத்தில் பிராமிஸ் டேவிட் கனடாவுக்காக பதில் கோல் அடித்து ஆட்டத்தில் பரபரப்பை ஏற்படுத்தினார். ஆனால் ஸ்விஸ் அணியின் தடுப்பாட்டத்தை மீறி கனடாவால் மேலும் கோல் அடிக்க முடியாமல், ஆட்டம் 2-1 என ஸ்விட்சர்லாந்து வெற்றியுடன் முடிந்தது.
மற்றொரு ஆட்டத்தில் கத்தார்–போஸ்னியா அணிகள் மோதின. 29வது நிமிடத்தில் கெரிம் அலாஜ்பெகோவிக் போஸ்னியாவுக்கு முன்னிலை கொடுத்தார். 34வது நிமிடத்தில் கத்தார் கோல் கீப்பரின் தவறால் ‘ஓன் கோல்’ ஏற்பட்டதால் 2-0 என போஸ்னியா முன்னிலை பெற்றது; 41வது நிமிடத்தில் ஹசன் அல் ஹைதோஸ் கத்தாருக்காக ஒரு கோல் அடித்து இடைவெளிக்கு முன் கணக்கை 2-1 ஆக மாற்றினார்.
இரண்டாம் பாதியில் 80வது நிமிடத்தில் எர்வின் மஹ்மக் போஸ்னியாவுக்காக மூன்றாவது கோலை அடித்து 3-1 என முடிவை உறுதி செய்தார். இந்த தோல்வியுடன் கத்தாரின் உலகக்கோப்பை பயணம் முடிவுக்கு வந்தது.
