புதுடில்லி: போதைப்பொருள் கடத்தலின் பின்னணியில் உள்ள கட்டமைப்புகளை கண்டறிந்து அழிக்கும் உத்திகளை மாநில அரசுகள் கடைபிடிக்க வேண்டும் என மத்திய உள்துறை அமைச்சர் அமித் ஷா வலியுறுத்தினார். போதைப்பொருள் கும்பல்கள் மற்றும் முக்கிய கும்பல் தலைவர்கள் மீது இரக்கமற்ற நடவடிக்கை எடுக்க வேண்டும் என்றும் அவர் தெரிவித்தார்.
போதை மருந்து கடத்தல் தொடர்பான ஒருங்கிணைப்பு அமைப்பில் நடைபெற்ற கூட்டத்தில் பேசிய அவர், போதைப்பொருள் எதிர்ப்பு நடவடிக்கைகளில் இந்தியா இன்று மிக முக்கியமான கட்டத்தில் இருப்பதாக கூறினார். வரும் மூன்று ஆண்டுகளில் போதைப்பழக்கம் நம்மை வெல்லுமா, அல்லது நாம் அதை வெல்லுமா என்பது தீர்மானிக்கப்படும் என்றும் அவர் எச்சரித்தார்.
இந்தப் போராட்டத்தில் அனைத்து அரசுகளும் ஒன்றிணைந்து செயல்பட வேண்டும் என அவர் கூறினார். சமூகத்திற்கு வழிகாட்டுபவர்கள், எதிர்காலத்தை வடிவமைக்கும் இளைஞர்கள், தூய்மை மற்றும் சமூக நலத்தை முன்னெடுக்கும் சக்திகள் ஆகியோரையும் இதில் இணைக்க வேண்டும் என்றும் அவர் வலியுறுத்தினார். போதைப்பொருள் கடத்தலை முற்றிலும் ஒழிக்க மாநிலங்கள் அனைத்தும் ஒருங்கிணைந்த அணுகுமுறையுடன் செயல்பட வேண்டியது அவசியம் எனவும் அவர் குறிப்பிட்டார்.
கடத்தல்காரர்களுக்கு எதிராக கடுமையான அணுகுமுறையைப் பின்பற்ற வேண்டும்; அதே நேரத்தில் பாதிக்கப்பட்டவர்களிடம் மனிதநேயமான அணுகுமுறை காட்ட வேண்டும் என்றும் அமித் ஷா கூறினார். போதைப்பொருள் புழக்கம் மற்றும் செயற்கை போதைப்பொருட்களுக்காக அமைக்கப்படும் ஆய்வகங்களை கண்டறிந்து, கடத்தல்காரர்களின் நெட்வொர்க்கை உடைத்து அழிக்க வேண்டும் என்றும், முக்கிய குற்றவாளிகளை எந்த காரணத்திற்காகவும் விட்டுவிடக் கூடாது என்றும் அவர் தெரிவித்தார்.
மொத்த அணுகுமுறையை சுருக்கமாக கூறிய அவர், “கண்டறி, மதிப்பீடு செய், அழி” என்ற மூன்று இலக்குகளுக்கு ஏற்ப தயாரிப்புகள் இருக்க வேண்டும் என அறிவுறுத்தினார்.
