அடுத்தடுத்து ஏற்பட்ட நிலநடுக்கங்களால் பாதிக்கப்பட்ட வெனிசுலாவுக்கு இந்தியா உதவிக்கரம் நீட்டியுள்ளது. இந்திய விமானப்படையின் இரண்டு C-17 ரக விமானங்களில் நிவாரணப் பொருட்கள் அனுப்பி வைக்கப்பட்டுள்ளன.
வெனிசுலாவில் ஏற்பட்ட நிலநடுக்கங்களில் உயிரிழந்தோர் எண்ணிக்கை 235 ஆக உயர்ந்துள்ளதாகவும், சுமார் 4,300 பேர் காயமடைந்துள்ளதாகவும் தகவல்கள் தெரிவிக்கின்றன. மீட்புப் பணிகள் முழு வீச்சில் தொடர்ந்து நடைபெற்று வருகின்றன.
பாதிக்கப்பட்ட மக்களுக்கு தேவையான அனைத்து உதவிகளும் செய்யப்படும் என பிரதமர் நரேந்திர மோடி முன்பே உறுதி அளித்திருந்தார். அதன்படி தற்போது நிவாரணப் பொருட்கள் அனுப்பி இந்தியா ஆதரவை வெளிப்படுத்தியுள்ளது.
மத்திய வெளியுறவுத்துறை அமைச்சர் எஸ். ஜெய்சங்கர், இந்த நிவாரண நடவடிக்கைக்கு “ஆபரேஷன் அமிஸ்டாட்” எனப் பெயரிடப்பட்டுள்ளதாக தெரிவித்தார். மேலும் இந்திய ராணுவத்தின் கள மருத்துவமனைப் பிரிவு ஒன்றும் அனுப்பப்பட்டுள்ளதாக கூறினார்.
35 டன்களுக்கு மேற்பட்ட நிவாரணப் பொருட்கள், மருந்துகள் மற்றும் மருத்துவ உபகரணங்கள் வெனிசுலாவுக்கு அனுப்பப்பட்டுள்ளன. இக்கட்டான நேரத்தில் வெனிசுலா அரசு மற்றும் மக்களுக்கு ஆதரவளிக்க இந்தியா உறுதியாக இருப்பதாக ஜெய்சங்கர் தெரிவித்தார்.
