மத்திய நிதியமைச்சர் நிர்மலா சீதாராமன், காஞ்சிபுரத்தை யுனெஸ்கோ பாரம்பரிய பட்டியலில் சேர்க்கும் குறித்து ஆலோசனை நடைபெற்றதாக தெரிவித்தார். காஞ்சிபுரம் அருகே கீழம்பியில் உள்ள எஸ்.எஸ்.கே.வி. கலை மற்றும் அறிவியல் மகளிர் கல்லூரியில் நடந்த புத்தக வெளியீட்டு விழாவில் அவர் இதை கூறினார்.
விழாவில் “பெண்ணின் பெருந்தக்க யாவுள” என்ற நூல் வெளியிடப்பட்டது. காஞ்சி மடாதிபதி விஜயேந்திர சரஸ்வதி சுவாமிகள், கல்வி நிறுவன நிர்வாகிகள் உள்ளிட்டோர் முன்னிலையில் நூல் வெளியீடு நடைபெற்றது. பெண்கள் கல்விக்காக நீண்ட காலமாக சேவை செய்து வரும் எஸ்.எஸ்.கே.வி. கல்வி நிறுவனத்தின் வரலாற்றை இந்த நூல் எடுத்துரைக்கிறது.
உரையில், காஞ்சிபுரத்தில் பழங்காலத்திலிருந்தே கல்விக்கு முக்கியத்துவம் அளிக்கப்பட்டதாக நிர்மலா சீதாராமன் கூறினார். இஸ்ரோ இன்று உலகளவில் பெருமைக்குரிய அமைப்பாக இருப்பதையும், வெளிநாடுகளிலிருந்தும் பலர் இஸ்ரோவுக்கு வருவதாகவும், குறைந்த செலவில் செயற்கைக்கோள்களை விண்ணில் செலுத்துகிறோம் என்பதையும் அவர் குறிப்பிட்டார்.
மேலும் சீனா, திபெத் மற்றும் வட மாநிலங்கள் உள்ளிட்ட பகுதிகளிலிருந்தும் காஞ்சிபுரத்திற்கு கல்வி கற்க மாணவர்கள் வருவதாக தெரிவித்தார். யுனெஸ்கோ பட்டியலில் சேர்க்கப்பட்டால் சில நல்ல அம்சங்களுடன் சில இடையூறுகளும் ஏற்படக்கூடும் என்றும், வீட்டில் ஜன்னல் மாற்றுவது போன்ற பணிகளுக்கும் அனுமதி தேவைப்படலாம்; அதனால் செயல்முறைகள் மெதுவாக நடக்கும் என்றும் அவர் விளக்கினார்.
இந்த நிகழ்ச்சியில் கல்லூரி தலைவர் நந்திதா கிருஷ்ணா, செயலர் ராமன் உள்ளிட்ட நிர்வாகிகள் மற்றும் உறுப்பினர்கள் பலர் கலந்து கொண்டனர்.
