அயோத்தி ராமர் கோவிலில் பக்தர்கள் வழங்கிய நன்கொடைகளில் முறைகேடு நடந்ததாக கூறப்படும் விவகாரம் தீவிரமடைந்துள்ளது. சிறப்பு புலனாய்வு குழு (SIT) எட்டு பேரை கைது செய்ததைத் தொடர்ந்து, அறக்கட்டளையின் உயர்நிலை நிர்வாகத்தில் ராஜினாமாக்களும் ஏற்பட்டுள்ளன.
ராம ஜென்மபூமி தீர்த்தஷேத்ரா அறக்கட்டளையின் பொதுச்செயலர் சம்பத் ராய், தார்மீக காரணங்களை முன்வைத்து பதவி விலகினார். அதேபோல், அறங்காவலர் அனில் மிஸ்ராவும் தனது பதவியை ராஜினாமா செய்தார்.
அறக்கட்டளை நிர்வாகத்தின் கோரிக்கையின்படி ஜூன் 14-ஆம் தேதி மூன்று பேர் கொண்ட SIT அமைக்கப்பட்டதாக தெரிவிக்கப்பட்டுள்ளது. கடந்த சில நாட்களாக கோவில் ஊழியர்கள், அர்ச்சகர்கள் உள்ளிட்டோரிடம் விசாரணை நடத்தப்பட்டதுடன், விசாரணைக்கு உட்பட்டவர்கள் அயோத்தி நகரை விட்டு வெளியேறக் கூடாது என கட்டுப்பாடுகளும் விதிக்கப்பட்டன.
கைது செய்யப்பட்டவர்களில் நன்கொடை பணத்தை எண்ணும் பணியில் ஈடுபட்ட ஊழியர்கள், அந்த பணியின் தலைவர் மற்றும் பொறுப்பாளர் (ஓய்வு பெற்ற வங்கி அதிகாரி உட்பட), மேலும் சம்பத் ராயின் டிரைவரும் நெருங்கிய உதவியாளருமாக குறிப்பிடப்படும் ராமசங்கர் யாதவ் ஆகியோர் இடம்பெற்றுள்ளனர். முறைகேட்டில் ராமசங்கர் யாதவ் முக்கிய பங்கு வகித்ததாக கூறப்படுகிறது.
முதல்வர் யோகி ஆதித்யநாத், SIT அறிக்கை கிடைத்ததும் உறுதியான நடவடிக்கை எடுக்கப்படும் என்றும், இதில் ஈடுபட்டவர்கள் யாராக இருந்தாலும் தப்ப முடியாது என்றும் தெரிவித்தார். இந்த விவகாரத்தை எதிர்க்கட்சிகள் அரசியலாக்குகின்றன என்றும், மக்களின் நம்பிக்கையை சீர்குலைக்கும் எந்த செயலையும் அரசு பொறுத்துக் கொள்ளாது என்றும் அவர் கூறினார்.
