சென்னை: அ.தி.மு.க.வில் ஏற்பட்ட பிளவை சரி செய்யும் நோக்கில், பொதுச்செயலர் எடப்பாடி கே. பழனிசாமி (இபிஎஸ்) அமைப்பு பொறுப்புகளில் மாற்றங்களை செய்து வருவதாக கட்சியின் மூத்த நிர்வாகிகள் தெரிவித்தனர். ஆனால் முன்னாள் அமைச்சர் சி.வி.சண்முகத்துடன் உள்ள மோதல் மட்டும் இன்னும் முடிவுக்கு வரவில்லை என்றும் அவர்கள் கூறினர்.
அதிருப்தி அணியினர் மீண்டும் இணைந்தபோதும், முன்பு பறிக்கப்பட்ட பதவிகளை திரும்ப வழங்காமல் இபிஎஸ் பிடிவாதமாக இருந்ததால் பலர் கட்சி தாவும் நிலைக்கு சென்றதாக நிர்வாகிகள் கூறினர். இதையடுத்து, இபிஎஸ்க்கு நெருக்கமான முன்னாள் நீதிபதி மற்றும் சில தொழிலதிபர்கள் அவரை சந்தித்து, திரும்பி வந்தவர்களுக்கு பொறுப்புகள் வழங்காமல் பழிவாங்கும் போக்கு நல்லதல்ல என அறிவுறுத்தியதாகவும் தெரிவித்தனர்.
கொங்கு மண்டலத்தில் கட்சி மீள எழுவதற்கு எஸ்.பி. வேலுமணி, பி. தங்கமணி போன்றோர் அவசியம் என கூறி, அனைவருக்கும் பொறுப்புகள் வழங்கி அருகில் வைத்துக்கொள்ள வேண்டும் என ஆலோசனை வழங்கப்பட்டதாகவும் அவர்கள் கூறினர். இதன் தொடர்ச்சியாக, கே.பி. விஸ்வநாதன் மற்றும் வேலுமணிக்கு துணை பொதுச்செயலர் பொறுப்பு வழங்கப்பட்டதாகவும், வேலுமணிக்கு தன்னுடன் சமமாக அந்த பதவி வழங்கப்படுவதற்கு கே.பி. முனுசாமி எதிர்ப்பு தெரிவித்தபோதும் அதை மீறி பொறுப்பு வழங்கப்பட்டதாகவும் தெரிவித்தனர்.
முன்னாள் அமைச்சர் ஆர். உதயகுமார் துணை பொதுச்செயலர் பதவியை எதிர்பார்த்திருந்தாலும், இபிஎஸ் அவரை முழுமையாக நம்பவில்லை என நிர்வாகிகள் கூறினர். மேலும் தங்கமணியிடம் உள்ள கோபம் இன்னும் குறையாத நிலையில், அவருக்கு குழுவுடன் சேர்த்து அமைப்பு செயலர் பொறுப்பு வழங்கப்பட்டதாகவும் தெரிவித்தனர்.
கட்சி தாவும் முடிவில் இருப்பதாக கூறப்படும் எம்.ஆர். விஜயபாஸ்கருக்கு கொள்கை பரப்பு இணை செயலர் பொறுப்பு வழங்கப்பட்டுள்ளதாகவும், ஆனால் சி.வி.சண்முகத்துக்கு இதுவரை எந்த பொறுப்பும் வழங்கப்படவில்லை என்றும் அவர்கள் கூறினர். சண்முகம் இபிஎஸை சந்திக்காமல், அவருக்கு எதிராக பேசிவருவதால் இபிஎஸ் கடும் கோபத்தில் இருப்பதாகவும், தொடர்ந்து இபிஎஸை குறித்து பேசினால் கட்சியிலிருந்து நீக்கும் நடவடிக்கையையும் அவர் பரிசீலிக்கலாம் என்றும் நிர்வாகிகள் தெரிவித்தனர்.
