சென்னை: தமிழக சட்டசபையில் தங்களின் பெரும்பான்மை பலத்தை மேலும் உறுதிப்படுத்தும் நோக்கில், 12 சட்டசபை தொகுதிகளுக்கு இடைத்தேர்தல் நடத்த ஆளுங்கட்சி தமிழக வெற்றிக் கழகம் (த.வெ.க.) திட்டமிட்டு நகர்கிறது என தகவல்கள் வெளியாகியுள்ளன.
சமீபத்திய சட்டசபைத் தேர்தலில் த.வெ.க. 108 தொகுதிகளில் வென்று, முதல்வர் விஜய் தலைமையில் ஆட்சி அமைந்தது. திருச்சி கிழக்கு மற்றும் சென்னை பெரம்பூர் தொகுதிகளில் வெற்றி பெற்ற விஜய், பின்னர் திருச்சி கிழக்கு எம்.எல்.ஏ. பதவியை ராஜினாமா செய்தார். மேலும் த.வெ.க.வைச் சேர்ந்த பிரபாகர் சபாநாயகராக பொறுப்பேற்றதால், சட்டசபையில் த.வெ.க. எம்.எல்.ஏ.க்களின் பலம் 106 ஆக குறைந்ததாக கூறப்படுகிறது.
இதனைத் தொடர்ந்து அ.தி.மு.க.வைச் சேர்ந்த நான்கு எம்.எல்.ஏ.க்கள் பதவியை ராஜினாமா செய்து த.வெ.க.வில் இணைந்ததாகவும், மேலும் புதுக்கோட்டை விஜயபாஸ்கர் மற்றும் கரூர் விஜயபாஸ்கர் ஆகியோர் எம்.எல்.ஏ. பதவிகளை ராஜினாமா செய்துள்ளதாகவும் அந்த செய்தி குறிப்பிடுகிறது. இதனால் ஏழு தொகுதிகளில் இடைத்தேர்தல் நடைபெறுவது உறுதி என கூறப்படுகிறது.
மேலும் வட மாவட்டங்களைச் சேர்ந்த இன்னும் நான்கு அ.தி.மு.க. எம்.எல்.ஏ.க்களை ராஜினாமா செய்ய வைப்பதன் மூலம் 12 தொகுதிகளுக்கு இடைத்தேர்தல் நடத்த த.வெ.க. தலைமை வியூகம் வகுப்பதாகவும், தி.மு.க.வில் அதிருப்தியில் உள்ள நான்கு எம்.எல்.ஏ.க்களுடன் ரகசிய பேச்சுவார்த்தை நடப்பதாகவும் அந்த செய்தி கூறுகிறது. அவ்வாறு ராஜினாமாக்கள் நடந்தால், இடைத்தேர்தல் தொகுதிகள் 16 ஆக உயர வாய்ப்பு உள்ளது.
12 அல்லது 16 தொகுதிகளில் இடைத்தேர்தல் நடந்தால் த.வெ.க. முழுமையாக வெற்றி பெற்று, கூட்டணி கட்சிகளின் ஆதரவின்றி ஐந்து ஆண்டுகள் ஆட்சி நடத்த முடியும் என முதல்வர் விஜயின் நெருங்கிய ஜோதிடர் கூறியதாகவும் அந்த செய்தியில் குறிப்பிடப்பட்டுள்ளது.
