தமிழகத்தில் பக்ரீத் பண்டிகை உள்ளிட்ட நாட்களில் பொது இடங்களில் பசுக்கள் அல்லது கன்றுக்குட்டிகளை வதைக்கக் கூடாது என்ற சென்னை உயர் நீதிமன்ற உத்தரவுக்கு எதிராக, தமிழக அரசு உச்ச நீதிமன்றத்தில் மேல்முறையீடு செய்துள்ளது.
இந்த உத்தரவு, கோவை மாவட்டத்தைச் சேர்ந்த ஹிந்து மக்கள் கட்சி நிர்வாகி சூர்யா பிரசாந்த் கடந்த மே 27-ல் தாக்கல் செய்த பொதுநல மனுவை விசாரித்த விடுமுறைக்கால அமர்வில் பிறப்பிக்கப்பட்டது. நீதிபதிகள் ஜி.ஆர். சுவாமிநாதன் மற்றும் வி. லட்சுமி நாராயணன் அமர்வு மனுவை விசாரித்தது.
அமர்வு வழங்கிய அறிவுறுத்தல்களில், பக்ரீத் முன்னிட்டோ அல்லது வேறு நாட்களிலோ தமிழகத்தில் பசு அல்லது கன்றுக்குட்டி வதை செய்யக் கூடாது என கூறப்பட்டது. மேலும், தற்காலிக கொட்டகைகள் அமைத்து பொது இடங்களை வதை கூடங்களாக அறிவிக்க காவல்துறைக்கு அதிகாரம் இல்லை என்றும் குறிப்பிடப்பட்டது.
சட்டப்படி விலங்குகளை வதைப்பதாக இருந்தால், உள்ளாட்சி அமைப்புகள் அங்கீகரித்து உரிமம் வழங்கிய இறைச்சிக் கூடங்களில் மட்டுமே அது நடைபெற வேண்டும் என்றும் நீதிமன்றம் தெரிவித்தது. பக்ரீத் காலத்தில் பசுக்களை மட்டுமே பலியிட வேண்டும் என்பது முஸ்லிம் மதக்கோட்பாடுகளில் கட்டாயமில்லை; பிற விலங்குகளையும் பலியிடலாம் என்றும் அமர்வு குறிப்பிட்டது.
இந்த தடை அமல்படுத்தப்படுவதை உறுதி செய்ய மாநில தலைமைச் செயலருக்கு உயர் நீதிமன்றம் அறிவுறுத்தியிருந்த நிலையில், தற்போது அந்த உத்தரவை எதிர்த்து அரசு உச்ச நீதிமன்றத்தை நாடியுள்ளது. இந்த நடவடிக்கை அரசியல் வட்டாரங்களிலும் ஹிந்து அமைப்புகளிடையிலும் எதிர்வினைகளை ஏற்படுத்தியுள்ளதாக செய்தி தெரிவிக்கிறது.
