தமிழகத்தில் நடைபெற உள்ள ஏழு தொகுதி இடைத்தேர்தலில் மதிமுக போட்டியிடாது என்று மதிமுக பொதுச் செயலர் வைகோ அறிவித்தார். திருநெல்வேலியில் செய்தியாளர்களிடம் பேசியபோது அவர் இதை தெரிவித்தார்.
கடந்த காலத்தில் உதயசூரியன் சின்னத்தில் போட்டியிட திமுக தங்களை நிர்ப்பந்தித்ததாக வைகோ கூறினார். மேலும், அதிமுக ஆட்சி அமைக்க திமுக வெளியிலிருந்து ஆதரவு அளிக்க முடிவு செய்ததாக கூறப்பட்ட தகவல்கள் உண்மை எனில், அதைவிட பெரிய அரசியல் மோசடி இருக்க முடியாது என்றும் அவர் விமர்சித்தார்.
கட்சியிலிருந்து விலகியவர்கள் குறித்து பேசும்போது, அவர்கள் தன்னை கடுமையாகப் பாதித்ததாக வைகோ கூறினார். இருப்பினும் சென்றவர்களை விமர்சிப்பது தனது வழக்கமல்ல என்றும், விலகிய பலர் மீண்டும் தன்னை சந்தித்துள்ளதாகவும் தெரிவித்தார்.
தமிழக வெற்றி கழகத்தை திராவிட இயக்கத்தின் ஓர் அங்கமாகவே பார்க்கிறேன் என்று வைகோ கூறினார். முதல்வர் விஜய் லஞ்சமில்லாத ஆட்சியை வழங்கி வருகிறார் என்றும், ‘கமிஷன்’ கலாசாரத்தை அவர் ஒழித்துள்ளார் என்றும் பாராட்டினார்.
இடைத்தேர்தலில் மதிமுக போட்டியிடாது என்றாலும், எதிர்காலத் தேர்தல்களில் சுயேச்சை சின்னத்தில் போட்டியிடத் தயாராக இருப்பதாக வைகோ தெரிவித்தார். மேலும், தனது பார்லிமென்ட் உரைகள் அடங்கிய ஆங்கில நூல் வெளியீட்டு விழா ஆகஸ்ட் 4-ஆம் தேதி டெல்லியில் நடைபெற உள்ளதாகவும், அதில் முதல்வர் விஜய் பங்கேற்கிறார் என்றும் கூறினார்.
