பார்லிமென்டின் மழைக்கால கூட்டத்தொடர் ஜூலை 20ல் தொடங்கி ஆகஸ்ட் 13 வரை நடைபெறும் என தகவல்கள் வெளியாகியுள்ளன. நான்கு வாரங்கள் நீடிக்கும் இந்த கூட்டத்தொடரில் 19 அமர்வுகள் இடம்பெறும் என கூறப்படுகிறது.
திரிணமுல் காங்கிரஸ் மற்றும் உத்தவ் சிவசேனா உள்ளிட்ட கட்சிகளில் ஏற்பட்ட உட்கட்சி மாற்றங்களுக்குப் பிறகு நடைபெறும் முதல் கூட்டத்தொடர் என்பதால் இது கவனம் பெறுகிறது. தகவலின்படி, திரிணமுல் காங்கிரஸின் 20 அதிருப்தி லோக்சபா எம்.பி.க்கள் திரிபுராவில் செயல்படும் ஒரு கட்சியில் இணைந்து, பா.ஜ. தலைமையிலான தேசிய ஜனநாயக கூட்டணிக்கு ஆதரவு தெரிவித்துள்ளனர்; லோக்சபாவில் தனி இருக்கை கோரியுள்ளதாகவும் கூறப்படுகிறது.
அதேபோல், உத்தவ் சிவசேனாவின் ஒன்பது லோக்சபா எம்.பி.க்களில் ஆறு பேர் ஏக்நாத் ஷிண்டே தலைமையிலான சிவசேனாவில் இணைந்து கூட்டணிக்கு ஆதரவு அளித்துள்ளதாக தகவல். இவர்களுக்கு தனி இருக்கைகள் ஒதுக்குவது குறித்து லோக்சபா சபாநாயகர் ஓம் பிர்லா ஆலோசித்து வருவதாகவும் கூறப்படுகிறது.
லோக்சபாவில் தே.ஜ. கூட்டணியின் பலம் உயர்ந்துள்ளதாக கூறப்படும் நிலையில், மகளிர் இடஒதுக்கீடு மசோதா மற்றும் தொகுதி மறுவரையறை தொடர்பான 131வது அரசியலமைப்பு திருத்த மசோதாவை மீண்டும் கொண்டு வர மத்திய அரசு திட்டமிட்டுள்ளதாக தகவல். திருத்தப்பட்ட வடிவில், லோக்சபா மற்றும் மாநில சட்டசபைகளின் உறுப்பினர் எண்ணிக்கையை 50% வரை உயர்த்தும் அம்சம் இடம்பெறலாம் எனவும் கூறப்படுகிறது.
இந்த மசோதாக்கள் ஏப்ரலில் பட்ஜெட் கூட்டத்தொடருக்குப் பிறகு நடந்த சிறப்பு கூட்டத்தொடரில் அறிமுகப்படுத்தப்பட்டாலும், அரசியலமைப்பு திருத்தத்திற்கு மூன்றில் இரு பங்கு பெரும்பான்மை தேவைப்படுவதால் நிறைவேறவில்லை. தற்போது மீதமுள்ள ஆதரவை இரு அவைகளிலும் திரட்ட முயற்சிகள் நடக்கின்றன என கூறப்படும் நிலையில், எதிர்க்கட்சிகள் ‘நீட்’ வினாத்தாள் கசிவு, பெட்ரோல்-டீசல் விலை உயர்வு, அயோத்தி ராமர் கோவில் நன்கொடை முறைகேடு குற்றச்சாட்டு, பேரிடர் மேலாண்மை, பணவீக்கம், வேலையில்லா திண்டாட்டம் மற்றும் வாக்காளர் பட்டியல் திருத்தம் உள்ளிட்ட விவகாரங்களை எழுப்ப தயாராக உள்ளதாக தகவல்கள் தெரிவிக்கின்றன.
