விஜய் தலைமையிலான த.வெ.க. அரசை நிலைகுலையச் செய்ய, த.வெ.க. எம்.எல்.ஏ.க்களை விலைக்கு வாங்கும் வகையில் ரூ.180 கோடி அளவிலான பேரம் பேசப்பட்டதாக சென்னை போலீசார் தெரிவித்துள்ளனர். இந்த தகவல் தொடர்ந்த விசாரணையில் வெளிவந்ததாகவும் போலீசார் கூறினர்.
ஊத்தங்கரை தொகுதி த.வெ.க. எம்.எல்.ஏ. இளையராஜா அளித்த புகாரின் அடிப்படையில் திருவல்லிக்கேணி போலீசார் வழக்கு பதிவு செய்தனர். இதையடுத்து அரும்பாக்கத்தைச் சேர்ந்த கருத்துக்கணிப்பு நிறுவனம் நடத்தும் திருநாவுக்கரசு (45), திருச்சியைச் சேர்ந்த நரேஷ் (45), மேடவாக்கத்தைச் சேர்ந்த தியாகராஜன் (40) உள்ளிட்ட 8 பேரை கைது செய்ததாக தெரிவிக்கப்பட்டுள்ளது.
தொடர் விசாரணையில், கோவை தெற்கு தொகுதி தி.மு.க. எம்.எல்.ஏ.வும் முன்னாள் அமைச்சருமான செந்தில் பாலாஜி மற்றும் அவரது சகோதரர் அசோக்குமார் ஆகியோர் பின்னணியில் இருப்பதாக தகவல் கிடைத்ததாக போலீசார் கூறினர். மேலும் கரூர் மாவட்டத்தைச் சேர்ந்த கார்த்திக் (43), ரமேஷ் (45) ஆகியோர் தொடர்பு ஏற்படுத்தியதாகவும் குறிப்பிடப்பட்டது.
சென்னை கிண்டியில் உள்ள நட்சத்திர ஹோட்டலில் நடந்த சந்திப்பில், குறைந்தது 10 த.வெ.க. எம்.எல்.ஏ.க்களை தி.மு.க. பக்கம் இழுக்கும் திட்டம் பேசப்பட்டதாக போலீசார் தெரிவித்தனர். சபாநாயகர் மீது நம்பிக்கை இல்லாத தீர்மானம் வரும் சூழலில், சபாநாயகருக்கு எதிராக வாக்களிக்கச் செய்து த.வெ.க. எண்ணிக்கையை குறைத்து ஆட்சியை கவிழ்ப்பதே நோக்கம் எனவும் கூறப்பட்டது.
அந்த முயற்சியின் ஒரு பகுதியாக, திருநாவுக்கரசு வழியாக இளையராஜாவை அணுகி, ஒரே தவணையில் ரூ.35 கோடி தருவதாக கூறி பக்கம் மாறவும், கூறியபடி வாக்களிக்கவும் வலியுறுத்தியதாக போலீசார் தெரிவித்தனர். அவர் மறுத்ததால், இதை வெளியே சொல்லக்கூடாது என மிரட்டியதாகவும் போலீசார் கூறினர்.
