குஜராத் மாநிலம் சனந்தில் உள்ள செமிகண்டக்டர் ஆலையில் பணிபுரியும் பெண்களுடன் தாம் கலந்துரையாடிய வீடியோவை பிரதமர் நரேந்திர மோடி சமூக வலைதளத்தில் பகிர்ந்துள்ளார். அந்த பதிவில், பெண்களின் மன உறுதியும் திறனும் தன்னை பெருமிதம் கொள்ளச் செய்ததாக அவர் குறிப்பிட்டார்.
சனந்த் பகுதியில் அமைந்துள்ள சிஜி செமி நிறுவனத்தின் செமிகண்டக்டர் ஆலையை பிரதமர் மோடி திறந்து வைத்து, அங்கு பார்வையிட்டு ஆய்வு செய்தார். இந்திய செமிகண்டக்டர் திட்டத்தின் கீழ் மத்திய அரசு முதற்கட்டமாக ஒப்புதல் அளித்த நான்கு முக்கிய திட்டங்களில் இதுவும் ஒன்றாகும்; ரூ.7,500 கோடி முதலீட்டில் இந்த ஆலை உருவாக்கப்பட்டுள்ளது.
திறப்பு விழாவின் சிறப்பான தருணங்களில் ஒன்று அங்கு பணிபுரிபவர்களுடன் உரையாடக் கிடைத்த வாய்ப்பே என பிரதமர் தெரிவித்தார். ஆலையில் பணிபுரியும் ஊழியர்களில் பெரும்பான்மையானோர் பெண்கள் என்றும் அவர் கூறினார்.
அவர்கள் இந்தியாவின் தொலைதூர பகுதிகளைச் சேர்ந்தவர்கள்; பலர் பழங்குடியினப் பின்னணியுடையவர்கள் என்றும் பதிவில் குறிப்பிடப்பட்டுள்ளது. பயிற்சி பெற்று செமிகண்டக்டர் துறையில் கற்றுத் தேர்ந்து, இன்று இந்தியாவின் செமிகண்டக்டர் துறைக்கு வலு சேர்க்கிறார்கள் என கூறிய பிரதமர், “பெண் சக்தி” குறித்து பெருமிதம் தெரிவித்தார்.
