பாகிஸ்தானில் இருந்து செயல்படுவதாகக் கருதப்படும் 23 பேரை, சட்டவிரோத நடவடிக்கைகள் தடுப்புச் சட்டம் (உபா) கீழ் பயங்கரவாதிகள் பட்டியலில் மத்திய அரசு சேர்த்துள்ளது. இவர்களுக்கு லஷ்கர்-இ-தொய்பா (LeT), ஜெய்ஷ்-இ-முகமது (JeM) உள்ளிட்ட தடைசெய்யப்பட்ட அமைப்புகளுடன் தொடர்புகள் உள்ளதாக அரசு தெரிவித்துள்ளது.
பாதுகாப்புப் படைகள் மீது தாக்குதல் நடத்துதல், ட்ரோன் மூலம் ஆயுதங்கள் கடத்துதல், இளைஞர்களை மூளைச் சலவை செய்து ஆட்கள் சேர்த்தல், பயங்கரவாதத்திற்கு நிதி திரட்டல் போன்ற செயல்களில் ஈடுபட்டதாகக் கூறி, இவர்களை மத்திய அரசு தீவிரமாக கண்காணித்து வந்ததாக தகவல் வெளியிடப்பட்டுள்ளது.
பட்டியலில் இடம்பெற்றவர்களில், லஷ்கர் நிறுவனர் ஹபீஸ் முகமது சயீத்தின் நெருங்கிய கூட்டாளிகள் என கூறப்படும் அப்துல் ரவுப், ராணா இப்திஹார் உள்ளிட்டோர் உள்ளனர். 23 பேரில் 17 பேர் பாகிஸ்தான் குடிமக்கள்; ஆறு பேர் இந்தியர்கள் என்றாலும், அவர்கள் தற்போது பாகிஸ்தான் மற்றும் பாகிஸ்தான் ஆக்கிரமிப்பு காஷ்மீர் பகுதிகளில் இருந்து பயங்கரவாத நடவடிக்கைகளைத் தூண்டுவதாக அரசு கூறியுள்ளது.
மத்திய உள்துறை அமைச்சர் அமித் ஷா, பிரதமர் நரேந்திர மோடியின் “பயங்கரவாதத்திற்கு பூஜ்ய சகிப்புத்தன்மை” கொள்கையை அடிப்படையாகக் கொண்டு இந்த நடவடிக்கை எடுக்கப்பட்டதாக தெரிவித்தார். எல்லை ஊடுருவல், ஆயுதக் கடத்தல், நிதி திரட்டல், ஆட்கள் சேர்ப்பு உள்ளிட்ட தேச விரோத நடவடிக்கைகளில் ஈடுபட்டதாகவும் அவர் கூறினார்.
2019-ல் ‘உபா’ சட்டம் திருத்தப்பட்ட பிறகு, அமைப்புகள் மட்டுமின்றி தனிநபர்களையும் பயங்கரவாதிகளாக அறிவிக்கும் அதிகாரம் மத்திய அரசுக்கு வழங்கப்பட்டதாக உள்துறை அமைச்சகம் நினைவூட்டியது. இந்த புதிய அறிவிப்புடன் ‘உபா’ சட்டத்தின் கீழ் பயங்கரவாதிகளாக அறிவிக்கப்பட்டவர்களின் எண்ணிக்கை 80 ஆக உயர்ந்துள்ளது; பட்டியலில் உள்ளவர்களின் சொத்துகளை முடக்குதல், நிதி பரிவர்த்தனைகளைத் தடை செய்தல், ஆயுத வாங்குதலைக் கட்டுப்படுத்தல் போன்ற நடவடிக்கைகளை தேசிய புலனாய்வு முகமை (NIA) மேற்கொள்ள முடியும் என்றும் தெரிவிக்கப்பட்டுள்ளது.
