அமெரிக்கா சுதந்திரம் பெற்று 250 ஆண்டுகள் நிறைவடைந்ததை முன்னிட்டு, ஜூலை 4 இரவு வாஷிங்டன் நேஷனல் மாலில் ‘சல்யூட் டூ அமெரிக்கா’ என்ற பிரமாண்ட நிறைவு விழா நடைபெற்றது. இதில் அதிபர் டொனால்டு டிரம்ப் முக்கிய உரையாற்றினார்.
உரையில், அமெரிக்காவை “மனித வரலாற்றின் மிக உன்னதமான சாதனை” என புகழ்ந்த அவர், இது அமெரிக்க வரலாற்றின் மகிழ்ச்சியும் பெருமையும் நிறைந்த தருணங்களில் ஒன்றாகும் என்றும் கூறினார்.
மேலும், இரண்டாம் உலகப் போரில் பங்கேற்ற முன்னாள் ராணுவ வீரர்கள் உள்ளிட்டோரையும், வியட்நாம் போரில் சிறப்புப் படைக்கு தலைமை வகித்த முதல் கருப்பின அதிகாரி உள்ளிட்டோரையும் அவர் கவுரவித்தார்.
ஆனால், சுதந்திர தின உரைகளில் வழக்கமாக இடம்பெறும் தேசிய ஒற்றுமை அழைப்பை விடுத்து, தனது அரசியல் நிலைப்பாடுகளையும் அவர் வலியுறுத்தியதாக சர்ச்சை எழுந்தது. தேர்தல் சீர்திருத்தம் தொடர்பான ‘சேவ் அமெரிக்கா சட்டம்’ மீது ஆதரவை மீண்டும் தெரிவித்த அவர், துப்பாக்கி வைத்திருக்கும் அரசியலமைப்புச் சட்ட உரிமையை பாதுகாக்க வேண்டும் என்றும் பேசினார்; கம்யூனிசத்துக்கு எதிரான விமர்சனங்களையும் மீண்டும் முன்வைத்தார்.
சுதந்திர தின உரைகளில் கட்சி அரசியலைத் தவிர்ப்பதே அமெரிக்க அதிபர்களின் நீண்டகால மரபாக கூறப்படும் நிலையில், வரவிருக்கும் நவம்பர் இடைக்காலத் தேர்தலை கருத்தில் கொண்டு இந்த மேடையை அரசியல் பிரசாரமாக மாற்றியதாக விமர்சனங்கள் எழுந்தன. இதேவேளை, பல நகரங்களில் அணிவகுப்புகள் மற்றும் வாணவேடிக்கைகள் நடந்தாலும், கிழக்கு கடலோரப் பகுதிகளில் கடும் வெப்பம் மற்றும் புயல் எச்சரிக்கை காரணமாக சில இடங்களில் நிகழ்ச்சிகள் ரத்து செய்யப்பட்டன.
