கேரளா வயநாடு மாவட்டத்தில் மேப்பாடி அருகே கல்லடி பகுதியில், கனமழை காரணமாக சுரங்கப்பாதை அமைக்கும் பணியிடத்தில் நிலச்சரிவு ஏற்பட்டதாக தகவல்கள் தெரிவிக்கின்றன. இரட்டை சுரங்கப்பாதை திட்டத்துடன் தொடர்புடைய பணிப்பகுதியில் ஏற்பட்ட இந்த விபத்தில் தொழிலாளர்கள் இடிபாடுகளில் சிக்கினர்.
இடிபாடுகளில் சிக்கியதாக கூறப்படும் 20 தொழிலாளர்களில் இதுவரை 5 பேர் உயிரிழந்ததாக உறுதிப்படுத்தப்பட்டுள்ளது. மீதமுள்ளவர்களை கண்டுபிடித்து மீட்கும் பணி தொடர்ந்து நடைபெற்று வருகிறது.
சம்பவ இடத்திற்கு தீயணைப்பு மற்றும் மீட்புத் துறையினர், பேரிடர் மீட்புக் குழுவினர் வந்துள்ளனர். நிலைமையை கருத்தில் கொண்டு தேடுதல் மற்றும் மீட்பு நடவடிக்கைகள் தீவிரமாக முன்னெடுக்கப்படுகின்றன.
கடந்த சில நாட்களாக தென்மேற்கு பருவமழை வயநாடு பகுதியில் அதிகரித்துள்ள நிலையில், 24 மணி நேரத்தில் பதிவான மழையளவில் மேப்பாடி 226 மிமீ, லக்கிடி 210 மிமீ, புத்துமலா 202 மிமீ, கல்லடி 188 மிமீ என குறிப்பிடப்பட்டுள்ளது.
இந்த சம்பவம் தொடர்பாக வயநாடு எம்பி பிரியங்கா வெளியிட்ட அறிக்கையில், மீட்புப்பணிகள் நடைபெற்று வருவதாகவும், முதல்வர் சதீஷன் நிலைமையை கண்காணித்து வருவதாகவும் தெரிவித்தார். உயிரிழந்தவர்களின் குடும்பங்களுக்கு இரங்கல் தெரிவித்த அவர், மாவட்ட நிர்வாகத்தின் வழிமுறைகளை பின்பற்றி பாதிக்கப்பட்டவர்களுக்கு உதவுமாறு காங்கிரஸ் தொண்டர்களை கேட்டுக்கொண்டார்.
