தென்காசி மாவட்டம் தமிழக–கேரள எல்லையில் உள்ள புளியரை போக்குவரத்து சோதனைச்சாவடி, தொடர்ச்சியாக எழுந்த லஞ்ச புகார்களின் பின்னணியில் மூடப்பட்டுள்ளது. அந்த சாவடியை அருகிலுள்ள போலீஸ் சோதனைச்சாவடியுடன் இணைத்து ஒருங்கிணைந்து செயல்பட கலெக்டர் ரஞ்சித் சிங் உத்தரவிட்டுள்ளார்.
புளியரை சோதனைச்சாவடி வழியாக தினமும் ஆயிரக்கணக்கான கனிமம் ஏற்றிய லாரிகள் கேரளாவுக்கு செல்வதாக கூறப்படுகிறது. இவ்வாகனங்களின் டிரைவர்களிடம் சோதனைச்சாவடி ஊழியர்கள் லஞ்சம் வாங்குவதாக புகார்கள் எழுந்த நிலையில், லஞ்ச ஒழிப்பு போலீசார் சோதனை நடத்தி பணம் பறிமுதல் செய்ததாக தகவல் வெளியாகியது.
மேலும், மலையாள செய்தி சேனல் ஒன்றில் சோதனைச்சாவடியில் லஞ்சம் வாங்குவது போன்ற காட்சிகள் வெளியாகி பரபரப்பை ஏற்படுத்தியது. இதையடுத்து சாவடி மூடப்பட்டதாக தெரிவிக்கப்பட்டுள்ளது.
இதற்கிடையில், கலெக்டர் வெளியிட்ட அதிகாரப்பூர்வ அறிக்கையில் செயல்பாட்டு காரணங்கள் குறிப்பிடப்பட்டுள்ளன. புளியரை போக்குவரத்து சோதனைச்சாவடியில் இருந்து சுமார் 1 கிமீ தொலைவில் போலீஸ் சோதனைச்சாவடியும் இயங்கி வருவதால், இரண்டிலும் அனைத்து வகை வாகனங்களும் சோதனை செய்யப்படுகின்றன; இதனால் போக்குவரத்து நெரிசல், குறிப்பாக குற்றால சீசன் காலங்களில் அதிகரிப்பதாகவும், அத்தியாவசிய பொருட்கள் ஏற்றிவரும் கனரக வாகனங்களின் ஆவண சரிபார்ப்பில் தாமதம் ஏற்படுவதாகவும் மாவட்ட நிர்வாகம் தெரிவித்துள்ளது.
இதன் அடிப்படையில், இனி புளியரை போக்குவரத்து சோதனைச்சாவடி தனியாக இயங்காமல், அருகிலுள்ள போலீஸ் சோதனைச்சாவடியுடன் இணைந்து ஒருங்கிணைந்து செயல்படும் என அறிக்கையில் கூறப்பட்டுள்ளது.
