கோவை மாவட்டம் மதுக்கரை அருகே தம்மனாம்பாறை மற்றும் ரொட்டிக்கவுண்டனூர் பகுதிகளில் தென்னந்தோப்புகளுக்கு இடையே இயங்கிய இரண்டு தொழிற்சாலை வளாகங்களில் மத்திய அரசின் மானிய உர மூட்டைகள் பதுக்கி வைக்கப்பட்டிருந்ததாக அதிகாரிகள் பறிமுதல் செய்துள்ளனர். விவசாயிகள் அளித்த தகவலின் அடிப்படையில் வேளாண் துறை, போலீஸ் மற்றும் குடிமைப்பொருள் வழங்கல் குற்றப்புலனாய்வு துறையினர் ஆய்வு நடத்தி, இரு யூனிட்களுக்கும் சீல் வைத்தனர்.
ஒரு தொழிற்சாலையில் 244 மூட்டைகள், மற்றொன்றில் 2,105 மூட்டைகள் கண்டுபிடிக்கப்பட்டதாகவும், மேலும் இரண்டு லாரிகளில் 495 மற்றும் 37 மூட்டைகள் இருந்ததாகவும் தெரிவிக்கப்பட்டது. மொத்தம் 2,881 மூட்டைகள் (சுமார் 130 டன்) பறிமுதல் செய்யப்பட்டு, மதிப்பு சுமார் ரூ.42 லட்சம் என கணக்கிடப்பட்டுள்ளது. கூடுதலாக 234 காலி பைகளும் இருந்ததாகவும், எந்த ஆவணமும் இன்றி பதுக்கப்பட்டிருந்ததாகவும் கூறப்படுகிறது.
விசாரணையில் தொழிற்சாலை வளாகத்தில் கொதிகலன் இருந்ததாகவும், உரத்தை கரைத்து திரவமாக்கி பிளைவுட் ஒட்டுவதற்கான பிசின் தயாரிப்பில் பயன்படுத்தி, டேங்கர் லாரிகளில் கேரளாவுக்கு எடுத்துச் சென்றதாகவும் குற்றப்புலனாய்வு துறையினர் தெரிவித்துள்ளனர். உர மாதிரிகள் சேலம் உரக்கட்டுப்பாடு ஆய்வகத்துக்கு அனுப்பப்பட்டுள்ளன; சீல் வைக்கப்பட்ட இடங்களில் பாதுகாப்பும் போடப்பட்டுள்ளது.
இந்த வழக்கில் தொழிற்சாலை நடத்துபவர்கள் மற்றும் இட உரிமையாளர் உள்ளிட்ட ஒன்பது பேர் மீது வழக்கு பதிவு செய்யப்பட்டு, நான்கு லாரிகள் மற்றும் ஒரு பைக் பறிமுதல் செய்யப்பட்டுள்ளன. ஆனால் இதுவரை இரண்டு டிரைவர்கள் மட்டும் கைது செய்யப்பட்டுள்ள நிலையில், மற்றவர்கள்மீது நடவடிக்கை இல்லாததை விவசாயிகள் கேள்வி எழுப்பி, வேளாண் அதிகாரிகளுக்கும் தொடர்பு இருக்கலாம் என்ற குற்றச்சாட்டுடன் மத்திய, மாநில அரசுகள் நேர்மையான விசாரணை நடத்தி துறை ரீதியான நடவடிக்கை எடுக்க வேண்டும் என வலியுறுத்தினர்.
இதனிடையே, கோவை மாவட்டத்தின் 12 வட்டாரங்களில் உர விற்பனை நிலையங்களின் இருப்பு நிலவரத்தை சரிபார்க்க அதிகாரிகள் குழுக்கள் அனுப்பப்பட்டுள்ளன. பறிமுதல் செய்யப்பட்ட உர மூட்டைகள் கோவை மாவட்டத்துக்கு ஒதுக்கப்பட்டவை அல்ல என்பது தெரியவந்ததாகவும், கைது செய்யப்பட்ட டிரைவர்கள் பட்டுக்கோட்டை மற்றும் சத்தியமங்கலத்திலிருந்து லாரிகளில் கொண்டு வந்ததாக வாக்குமூலம் அளித்ததாகவும் கூறப்படுகிறது.
