தமிழக காங்கிரசில் கட்சி பதவிகளும் சட்டசபை தேர்தல் சீட்டுகளும் கிடைக்காததால் முன்னாள் மத்திய அமைச்சர் ப. சிதம்பரம் ஆதரவாளர்கள் அதிருப்தியடைந்து, த.வெ.க. நோக்கி நகர்ந்து வருவதாக தகவல் வெளியாகியுள்ளது.
சிதம்பரமும் அவரது மகன் கார்த்தியும் மாநிலம் முழுவதும் ஆதரவாளர்களைக் கொண்டிருப்பதாகவும், மறைந்த முன்னாள் தலைவர் இளங்கோவன் ஆதரவாளர்களில் சிலரும் இந்தக் குழுவில் இருப்பதாகவும் கூறப்படுகிறது. சட்டசபை தேர்தலில் தனது ஆதரவாளர்களுக்கு சீட் பெற்றுத் தர டில்லி மேலிடத்தில் சிதம்பரம் முயன்றும் அது கைகூடவில்லை என தெரிவிக்கப்படுகிறது.
இதன் பின்னணியில், அவருக்கு நெருக்கமாக இருந்த மாநில மற்றும் மாவட்ட நிர்வாகிகள் சிலர் விலகி வருவதாகவும், தமிழக காங்கிரஸ் முன்னாள் பொதுச்செயலர் சுந்தர்ராஜன் தலைமையில் சுமார் 10,000 பேர் ஜூலை 19-ம் தேதி த.வெ.க.வில் இணைவதாகவும் அந்தத் தகவல் கூறுகிறது.
மேலும், செல்வப்பெருந்தகை தமிழக காங்கிரஸ் தலைவராக இருந்த காலத்தில் சிதம்பரம் ஆதரவாளர்களுக்கு கட்சி பதவிகள் வழங்கப்படவில்லை; தேர்தலிலும் சீட் கிடைக்கவில்லை எனவும் குறிப்பிடப்படுகிறது. இதனால் அதிருப்தியடைந்த குழுவைச் சேர்ந்த மாநில நிர்வாகி அருள் பெத்தையா, இளைஞர் காங்கிரஸ் முன்னாள் தலைவர் விஜய இளஞ்செழியன், பிற்படுத்தப்பட்டோர் பிரிவு துணைத் தலைவர் ரவிராஜ் உள்ளிட்டோர், தற்போதைய தமிழக காங்கிரஸ் தலைவர் மாணிக்கம் தாகூர் அணிக்குச் சென்றதாகவும் தெரிவிக்கப்படுகிறது.
சிதம்பரம் மாநில அல்லது தேசிய அளவில் முக்கியப் பதவி பெறும் பட்சத்தில் மட்டுமே, தன்னுடன் இருக்கும் சில ஆதரவாளர்களையாவது தக்க வைத்துக்கொள்ள முடியும் என அவரது அணியினர் கருத்து தெரிவிப்பதாகவும் அந்தத் தகவல் கூறுகிறது.
