தஞ்சாவூர் மாவட்டத்தில் உள்ள கொள்முதல் நிலையங்கள் மற்றும் திறந்தவெளி சேமிப்பு இடங்களில் பாதுகாப்பு இல்லாமல் வைக்கப்படும் நெல் மூட்டைகள் வெயிலும் மழையும் காரணமாக சேதமடைகின்றன என விவசாயிகள் புகார் தெரிவித்துள்ளனர். குறிப்பாக, திருநாகேஸ்வரத்தில் உள்ள தமிழ்நாடு நுகர்பொருள் வாணிப கழக (TNCSC) வளாகத்தில் நெல் மூட்டைகள் திறந்தவெளியில் வைக்கப்படுவதால் வீணாகும் நிலை ஏற்பட்டுள்ளதாக அவர்கள் கூறினர்.
திருநாகேஸ்வரத்தில் நவீன அரிசி ஆலை செயல்படுகிறது; அரவைக்கு வரும் நெல் மூட்டைகளை பாதுகாக்க ஏழு கிடங்குகள் உள்ளன. ஆனால், இதில் இரண்டு கிடங்குகளில் பயன்படுத்தி வீணான கிழிந்த சாக்குகள் சுமார் 18 லட்சம் எண்ணிக்கையில் குவித்து வைக்கப்பட்டுள்ளதாக விவசாயிகள் தெரிவிக்கின்றனர்.
இந்த கிழிந்த சாக்குகள் சுமார் 10 ஆண்டுகளாக அப்படியே கிடப்பில் உள்ளதாகவும், அவை பிடித்துள்ள இடத்தில் சுமார் 4,800 டன் நெல் மூட்டைகளை அடுக்கி வைக்க முடியும் என்றும் அவர்கள் கூறினர். இதே நேரத்தில், “கிடங்கு இடம் இல்லை” என அதிகாரிகள் கூறுவது தவறான தகவல் எனவும், இதனால் நெல் மூட்டைகள் வெளியில் வைத்து சேதமடைவதாகவும் குற்றம்சாட்டினர்.
சமீபத்தில் ஆய்வுக்கு வந்த உணவுத்துறை அமைச்சர் வெங்கடரமணன் மற்றும் வேளாண் அமைச்சர் வினோத் ஆகியோர் சேமிப்பு நிலையை நேரில் பார்க்க முயன்றபோது அதிகாரிகள் தடுப்பதாகவும் விவசாயிகள் கூறினர். மேலும், மூன்று ஆண்டுக்கு ஒருமுறை புதிய சாக்குகளை பயன்படுத்தி, பழையவற்றை அப்புறப்படுத்த வேண்டும்; கடந்த ஆண்டு பழைய சாக்குகளை அகற்ற டெண்டர் விடப்பட்டும் யாரும் எடுக்க முன்வரவில்லை என்றும் அவர்கள் தெரிவித்தனர்.
இதுகுறித்து நுகர்பொருள் வாணிப கழகத்தின் முதுநிலை மண்டல மேலாளர் செல்வாவிடம் விளக்கம் கேட்க முயன்றபோது, அவர் அழைப்பை ஏற்கவில்லை என தகவல் தெரிவிக்கப்பட்டது.
