பொள்ளாச்சி அருகே ஆச்சிப்பட்டியில் நடைபெற்ற ‘வீ த லீடர்ஸ்’ அமைப்பின் முதல் மாநாட்டில் பாஜக தலைவர் கே. அண்ணாமலை பேசினார். அப்போது, 2031ல் தமிழகத்தில் இன்னொரு ஆட்சி மாற்றம் உறுதியாக நடைபெறும் என அவர் தெரிவித்தார்.
இந்த நிகழ்வு பதவி, பொறுப்பு மையமாக இல்லாமல், அனைவரும் சமமாக இணையும் தன்னார்வ இயக்கமாக இருக்க வேண்டும் என்று அவர் வலியுறுத்தினார். தன்னை “தலைமைச் சேவகன்” என குறிப்பிட்ட அவர், இயக்கத்தில் சேர்ந்தவர்களுக்கு பதவிகள் வழங்கப்படவில்லை என்றும் கூறினார்.
ஜூன் 5 அன்று தொடங்கப்பட்ட இந்த அமைப்பு, சமூகப் பிரச்னைகளை கண்டறிந்து தீர்வில் தனிநபரும் பங்கெடுக்க வேண்டும் என்ற எண்ணத்தை உருவாக்குவதற்காக தொடங்கப்பட்டதாக அவர் விளக்கினார். ஜூலை மாத போதை எதிர்ப்பு விழிப்புணர்வு தொடர்பாக கடந்த ஒரு மாதமாக தன்னார்வலர்கள் வீடு வீடாக சென்று பேசிவருவதாகவும் கூறினார்.
தொடங்கிய 38 நாட்களில் 19 லட்சத்துக்கும் மேற்பட்டோர் இணைந்துள்ளதாக அவர் கூறினார். யாரையும் தனிப்பட்ட முறையில் அழைத்து சேரச் சொல்லவில்லை என்றும், இது குடும்பத்துக்குச் சொந்தமான அமைப்பு அல்ல; மக்களுக்குச் சொந்தமானது என்றும் அவர் தெரிவித்தார். போதை எதிர்ப்பு, பெண்கள் பாதுகாப்பு, இளைஞர் நலன் போன்ற சமூகப் பணிகள் மூலம் மக்கள் தாமாக இணையும் வகையில் இயக்கத்தை வளர்க்க வேண்டும் என அவர் கேட்டுக்கொண்டார்.
