இந்தியாவில் 50 கோடிக்கும் மேற்பட்டோர் பயன்படுத்தும் வாட்ஸாப்பில், உரையாடல் அல்லது அழைப்பின் போது இரு தரப்பினரும் ஒருவரின் மொபைல் எண்ணை மற்றொருவர் பார்க்கும் நடைமுறை உள்ளது. இதற்கு மாற்றாக, மொபைல் எண் பகிராமல் ‘யூசர் நேம்’ மூலம் தகவல் பரிமாறும் வசதியை அறிமுகப்படுத்த வாட்ஸாப் திட்டமிட்டுள்ளது.
இந்த மாற்றம் பொதுமக்கள் பாதுகாப்புக்கு அச்சுறுத்தலாக இருக்கலாம் எனக் கூறி, மத்திய மின்னணு மற்றும் தகவல் தொழில்நுட்ப அமைச்சகம் மெட்டா நிறுவனத்திற்கு நோட்டீஸ் அனுப்பி விளக்கம் கேட்டது. இதையடுத்து, அந்த வசதியின் பாதுகாப்பு அம்சங்கள் மற்றும் ஏற்படக்கூடிய பாதிப்புகள் குறித்து ஆய்வு செய்து மெட்டா விளக்கத்தை அரசுக்கு அனுப்பியுள்ளது.
மெட்டா அளித்த விளக்கத்தில், ஆள் மாறாட்டத்தைத் தடுக்கும் புதிய அம்சங்கள் சேர்க்கப்பட்டுள்ளன என்றும், உண்மையான பயனாளர்கள் மட்டுமே குறிப்பிட்ட பெயரை பயன்படுத்த முடியும் என்றும் கூறப்பட்டுள்ளது. மேலும், ‘யூசர் நேம்’ நடைமுறைக்கு வந்தாலும் மொபைல் எண் கட்டாயமாகவே இருக்கும்; அதனால் மோசடியாளர்களை அடையாளம் காண முடியும் எனவும் தெரிவித்துள்ளது.
இந்த விளக்கத்தை மத்திய அரசு பரிசீலித்து, ‘யூசர் நேம்’ வசதியை அனுமதிக்கலாமா அல்லது தடை விதிக்கலாமா என்பது குறித்து விரைவில் அறிவிப்பு வெளியிடும் என எதிர்பார்க்கப்படுகிறது. மொபைல் எண் மறைக்கப்படுவதால் சைபர் குற்றங்கள் அதிகரிக்கலாம்; குற்றவாளிகளை கண்டுபிடிப்பது காவல்துறைக்கு சவாலாகலாம் என்ற அச்சமும் இதில் பிரதானமாக உள்ளது.
மேலும், மொபைல் எண் இன்று வெறும் தொலைபேசி எண்ணாக இல்லாமல் வங்கி சேவைகள், பணம் செலுத்துதல், சுகாதாரம், கல்வி உள்ளிட்ட பல இணைய சேவைகளுடன் இணைந்த முக்கிய டிஜிட்டல் அடையாளமாக மாறியுள்ளதால், இந்த மாற்றத்தை தீவிரமாக ஆய்வு செய்வது அவசியம் என கட்டுரை வலியுறுத்துகிறது.
