அதிமுக பொதுச்செயலர் எடப்பாடி கே. பழனிசாமி (இபிஎஸ்) செவ்வாய்க்கிழமை, முதல்வர் விஜய் பெரும்பான்மையுடன் ஆட்சி நடத்தவில்லை என்றும், பிற கட்சிகளில் வெற்றி பெற்ற எம்எல்ஏக்களின் ஆதரவையே நம்பி அரசு இயங்குகிறது என்றும் குற்றம்சாட்டினார்.
சேலத்தில் செய்தியாளர்களிடம் பேசிய அவர், விஜய் 108 இடங்களில் மட்டுமே வெற்றி பெற்றதாகவும், மற்ற கட்சிகளில் வென்ற எம்எல்ஏக்களை “இரவல்” வாங்கி ஆட்சியை தாங்கி நிறுத்துகிறார் என்றும் தெரிவித்தார். கரூரில் முதல்வர் பேசியபோது திமுகவும் அதிமுகவும் “கூட்டுக் களவாணிகள்” என குறிப்பிட்டதாக கூறி, அந்த வார்த்தைகள் முதல்வர் பதவிக்கு ஏற்றதா எனவும் அவர் கேள்வி எழுப்பினார்.
மேலும், அதிமுக இரட்டை இலைச் சின்னத்தில் வென்ற சில எம்எல்ஏக்களை “குதிரை பேரம்” மூலம் ராஜினாமா செய்ய வைத்து, பின்னர் விஜயின் கட்சியில் இணைத்ததாகவும் இபிஎஸ் குற்றம்சாட்டினார். “தூய ஆட்சி, வெளிப்படையான ஆட்சி” என்ற வாக்குறுதிகள் எங்கே என கேட்டு, யார் யாரை எந்த அடிப்படையில் சேர்த்துக் கொள்கிறார்கள் என்றும் சந்தேகம் வெளியிட்டார்.
கூட்டணி கட்சித் தலைவர்கள் நாளுக்கு நாள் முரண்பட்ட கருத்துகளை கூறுவதாகவும், அத்தகைய நிலைப்பாடுகளை நம்பி ஆட்சி நடத்துவது சரியா என்றும் அவர் விமர்சித்தார். முதல்வர் ஆக்கப்பூர்வமாக பேச வேண்டும்; மேடைப் பேச்சாளர் போல் பேசக்கூடாது என்றும் கூறிய இபிஎஸ், எம்எல்ஏக்கள் ராஜினாமா செய்து கட்சி மாறுவது தமிழகத்தில் முதல்முறையாக நடக்கிறது என்றும் தெரிவித்தார்.
சேலம் மாவட்டம் ஓமலூரில் நடைபெற்ற இந்த செய்தியாளர் சந்திப்பு தினமலர் இணையதளம் மற்றும் சமூக வலைதளங்களில் நேரலையாக ஒளிபரப்பப்பட்டது.
