கரூர் மாவட்டத்தில் கோவில்களுக்கு சொந்தமான நிலங்களுக்கு பத்திரப்பதிவு செய்ய விதிக்கப்பட்ட தடையை நீக்கிய உத்தரவுக்கு எதிராக, சென்னை உயர்நீதிமன்றத்தின் மதுரை கிளையில் மனு தாக்கல் செய்யப்பட்டுள்ளது.
மனுவில் கூறப்பட்டதாவது: கரூர் கல்யாண பசுபதீஸ்வரர் சுவாமி கோவில், புகழிமலை பாலசுப்பிரமணிய சுவாமி கோவில், குப்புச்சிபாளையம் ரவீஸ்வரர் கோவில் மற்றும் வெஞ்சமாங்கூடலூர் விக்ருதீஸ்வரர் கோவிலுக்கு சொந்தமான 3,084.95 ஏக்கர் நிலங்கள் 15 கிராமங்களில் உள்ளன. இந்நிலங்களுக்கு 3,390 தனிநபர்கள் பெயரில் ரயத்துவாரி பட்டாக்கள் வழங்கப்பட்டதாகவும் குறிப்பிடப்பட்டுள்ளது.
இந்த நிலங்களுக்கு பத்திரப்பதிவு செய்ய முன்பே தடை விதிக்கப்பட்டிருந்த நிலையில், அந்தத் தடையை ஜூலை 9 அன்று கலெக்டர் உத்தரவிட்டு நீக்கியதாக மனுதாரர் சேலம் ராதாகிருஷ்ணன் நீதிமன்றத்தில் தெரிவித்தார். ஹிந்து சமய அறநிலையத்துறை (HR&CE) கமிஷனர் மற்றும் அரசின் முன் அனுமதி இன்றி கோவில் நிலங்களை பதிவு செய்ய அதிகாரிகள் வழிவகுத்ததாகவும் அவர் குற்றம்சாட்டினார்.
நிலத்தின் மதிப்பு சுமார் ரூ.25,000 கோடி எனக் கூறிய மனுதாரர், ஆக்கிரமிப்பாளர்களின் நலனுக்காகவே தடை நீக்கப்பட்டதாகவும், அது தன்னிச்சையான முடிவு எனவும் வாதிட்டார். கலெக்டர் உத்தரவை ரத்து செய்யவும், அவசர வழக்காக விசாரணைக்கு எடுத்துக்கொள்ளவும் கோரினார்.
நீதிபதிகள் சி.வி. கார்த்திகேயன், ஆர். சக்திவேல் அமர்வு, மனுவுக்கு பதிவுத்துறை பிரதான எண் வழங்கப்பட வேண்டும்; அதன் பின் வழக்கு விசாரணை பட்டியலில் இடம்பெறும் போது விசாரிக்கப்படும் என தெரிவித்தது.
