சென்னையில் சபாநாயகருக்கு எதிராக வாக்களிக்க த.வெ.க. எம்எல்ஏ இளையராஜாவுக்கு ரூ.35 கோடி தருவதாக பேரம் பேசப்பட்டதாக கூறப்படும் விவகாரத்தில் போலீசார் விசாரணை நடத்தி வருகின்றனர். இது தொடர்பாக இளையராஜா திருவல்லிக்கேணி காவல் நிலையத்தில் புகார் அளித்துள்ளார்.
புகாரின் அடிப்படையில் வழக்குப் பதிவு செய்யப்பட்டு 11 பேர் கைது செய்யப்பட்டனர். அவர்களிடம் நடந்த விசாரணையில் முன்னாள் திமுக அமைச்சர் செந்தில்பாலாஜி மற்றும் அவரது சகோதரர் அசோக்குமார் தொடர்பு இருப்பதாக தெரிய வந்ததாக கூறப்பட்டதைத் தொடர்ந்து, இருவருக்கும் சம்மன் மற்றும் ‘லுக் அவுட் நோட்டீஸ்’ வழங்கப்பட்டதாக தகவல் வெளியாகியுள்ளது.
இதையடுத்து செந்தில்பாலாஜி மற்றும் அசோக்குமார் முன்ஜாமின் கோரி சென்னை உயர்நீதிமன்றத்தில் மனுத் தாக்கல் செய்தனர். விசாரணை அதிகாரி முன் காலை, மாலை என இரு வேளையும் கையெழுத்திட வேண்டும் உள்ளிட்ட நிபந்தனைகளுடன் நீதிமன்றம் முன்ஜாமின் வழங்கியது.
ஆனால், இருவரும் விசாரணை அதிகாரி முன் ஆஜராகவில்லை என தெரிவிக்கப்பட்டுள்ளது. மேலும், முதல் தகவல் அறிக்கையில் (FIR) தனது பெயர் இல்லை என்பதால் விசாரணைக்கு ஏன் ஆஜராக வேண்டும் என்றும், ஆஜரானால் வேறு வழக்கில் கைது செய்யக்கூடாது என்றும் கூறி செந்தில்பாலாஜி திருவல்லிக்கேணி போலீசாருக்கு தபால் அனுப்பியதாக செய்தி கூறுகிறது.
இதற்கிடையில், இந்த பேரம் வழக்கில் கைது செய்யப்பட்டவர்களிடமிருந்து பல லட்சம் ரூபாய் பறிமுதல் செய்யப்பட்டதாக போலீசார் தெரிவித்துள்ளனர். இதன் பின்னணியில் செந்தில்பாலாஜி மற்றும் அசோக்குமார் தொடர்பாக சட்டவிரோத பணப் பரிமாற்றம் நடந்ததா என்பதை ஆராய, திருவல்லிக்கேணி போலீசாரிடமிருந்து வழக்கு ஆவணங்களை அமலாக்கத்துறை (ஈ.டி.) பெற்றுக் கொண்டு விசாரணையை தொடங்கியுள்ளதாக கூறப்படுகிறது.
