ஹார்முஸ் ஜலசந்தி வழியாக பயணிக்கும் கப்பல்களில் இந்திய மாலுமிகளை பணியமர்த்துவதை மறு உத்தரவு வரும் வரை தவிர்க்க வேண்டும் என கடல்சார் நிர்வாகப் பொது இயக்குனரகம் (டிஜிஎம்ஏ) கப்பல் உரிமையாளர்கள், மேலாளர்கள் மற்றும் ஆட்கள் தேர்வு செய்து பணியமர்த்தும் நிறுவனங்களுக்கு அறிவுறுத்தியுள்ளது.
மேற்காசியாவில் நிலவும் போர் சூழல் காரணமாக பதற்றம் அதிகரித்துள்ள நிலையில் இந்த அறிவுறுத்தல் வெளியிடப்பட்டுள்ளது. செய்தியின்படி, ஹார்முஸ் ஜலசந்தியை ஈரான் மூடியுள்ளதுடன், அந்த வழியாக செல்லும் கப்பல்களை தாக்கி வருகிறது. இதில் இந்தியர் ஒருவர் உயிரிழந்ததாகவும், சிலர் காயமடைந்து சிகிச்சை பெற்று வருவதாகவும் தெரிவிக்கப்பட்டுள்ளது.
இந்த சம்பவம் தொடர்பாக மத்திய அரசு ஈரானுக்கு கண்டனம் தெரிவித்ததாகவும் செய்தியில் கூறப்பட்டுள்ளது.
டிஜிஎம்ஏ கடிதத்தில், பாரசீக வளைகுடா, ஹார்முஸ் ஜலசந்தி மற்றும் அதனை ஒட்டிய கடல் பகுதிகளில் இயங்கும் கப்பல்களில் உயர் மட்ட பாதுகாப்பு ஏற்பாடுகளை மேற்கொள்ள வேண்டும் என்றும் வலியுறுத்தப்பட்டுள்ளது.
மேலும், அதிகாரிகள் வெளியிடும் பயண எச்சரிக்கைகள் மற்றும் பாதுகாப்பு ஆலோசனைகளை தொடர்ந்து கண்காணித்து, சர்வதேச கப்பல் மற்றும் துறைமுகப் பாதுகாப்பு (ISPS) நெறிமுறைக்கு ஏற்ப அனைத்து பாதுகாப்பு நடவடிக்கைகளையும் செயல்படுத்த வேண்டும் எனவும் அறிவுறுத்தப்பட்டுள்ளது.
