மம்தா பானர்ஜியின் தலைமையுக்கு எதிராக விலகிய அதிருப்தி எம்.பி.க்களுக்கு, லோக்சபாவில் தனியாக இருக்கைகள் ஒதுக்கப்படுவதோடு, பார்லிமென்ட் வளாகத்தில் புதிய அலுவலகமும் வழங்கப்பட உள்ளதாக சபாநாயகர் அலுவலகத் தரப்பில் இருந்து தகவல் வெளியாகியுள்ளது.
இந்த மாற்றம், பார்லிமென்டில் திடீரென ஏற்பட்ட அரசியல் மறுசீரமைப்பின் தொடர்ச்சியாக பார்க்கப்படுகிறது. பிரிந்த எம்.பி.க்கள், கொல்கட்டாவை தலைமையிடமாகக் கொண்ட ‘நேஷனலிஸ்ட் சிட்டிசன்ஸ் பார்ட்டி ஆப் இந்தியா’ (என்.சி.பி.ஐ.) என்ற கட்சியில் இணைந்ததாக அறிவித்ததுடன், அந்தக் கட்சி தே.ஜ. கூட்டணியில் இடம்பெறும் என்றும் தெரிவித்துள்ளனர்.
மேற்கு வங்க சட்டசபைத் தேர்தலில் திரிணமுல் காங்கிரஸ் கடுமையான தோல்வியை சந்தித்த பின்னர், அக்கட்சியை சேர்ந்த 60 எம்.எல்.ஏ.க்கள் சட்டசபையில் தனி அமைப்பை உருவாக்கினர். இதே பின்னணியில், லோக்சபாவில் உள்ள 28 எம்.பி.க்களில் 20 பேர் என்.சி.பி.ஐ.யில் இணைந்ததாக கூறப்படுகிறது.
இந்த நிலையில், பார்லிமென்டில் தங்களை அங்கீகரிக்க கோரி புதிய கட்சி சபாநாயகர் ஓம் பிர்லாவை சந்தித்து கோரிக்கை வைத்தது. இதையடுத்து, புதிய இருக்கை எண்களுடன் இருக்கைகள் ஒதுக்கப்பட உள்ளதாகவும், அலுவலகம் வழங்கப்படும் என்றும் உறுதி அளிக்கப்பட்டதாக கட்சியின் கொறடா ககோலி கோஷ் எம்.பி. தெரிவித்துள்ளார்.
மேலும், ஜூலை 19-ல் நடைபெற உள்ள அனைத்துக் கட்சிக் கூட்டத்தில் தங்கள் கட்சியின் இரண்டு பிரதிநிதிகள் பங்கேற்பார்கள் என்றும் அவர் கூறினார். ஒரே இரவில் பார்லிமென்டிற்குள் முக்கிய சக்தியாக உருவெடுத்ததாக கூறப்படும் என்.சி.பி.ஐ. தொடர்பான இந்த நிகழ்வுகள் தேசிய அரசியல் வட்டாரத்தில் பரபரப்பை ஏற்படுத்தியுள்ளது.
