ஹைதராபாதை தலைமையிடமாகக் கொண்ட ஸ்கைரூட் ஏரோஸ்பேஸ் நிறுவனம், ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் இருந்து ஜூலை 18 அன்று ‘விக்ரம்-1’ ராக்கெட்டை வெற்றிகரமாக ஏவியது. 2022-ல் ‘விக்ரம்-எஸ்’ ஏவுதலுக்குப் பிறகு, இது இந்தியாவின் வளர்ந்து வரும் தனியார் விண்வெளித் துறைக்கு முக்கிய முன்னேற்றமாக பார்க்கப்படுகிறது.
இந்த ஏவுதல் காலை 11.30 மணிக்கு திட்டமிடப்பட்டிருந்த நிலையில், சிறிய தாமதத்துடன் 12.05 மணிக்கு நடைபெற்றது. பின்னர் ராக்கெட் புவி வட்டப்பாதையில் வெற்றிகரமாக நிலைநிறுத்தப்பட்டதாக தகவல் தெரிவிக்கப்பட்டுள்ளது.
சிறிய செயற்கைக்கோள்களை புவி சுற்றுவட்டப் பாதையில் நிலைநிறுத்தும் நோக்கில் உருவாக்கப்பட்ட ‘விக்ரம்-1’ ராக்கெட், 350 கிலோ வரை சுமக்கும் திறன் கொண்டது. இதில் அதிக உந்துவிசை கொண்ட திட எரிபொருள் பூஸ்டர்கள் பயன்படுத்தப்பட்டுள்ளன.
இந்த சாதனை குறித்து மத்திய அமைச்சர் ஜிதேந்திர சிங், இது ஒவ்வொரு இந்தியருக்கும் பெருமைக்குரிய தருணம் எனக் கூறினார். கடந்த ஆறு ஆண்டுகளில் தனியார் நிறுவனங்களுக்கு விண்வெளித் துறையில் வாய்ப்பு வழங்கப்பட்டதன் விளைவாக இத்தகைய ஏவுதல்கள் சாத்தியமானதாகியுள்ளன என்றும் அவர் குறிப்பிட்டார்.
மேலும், ஸ்ரீஹரிகோட்டாவில் இருந்து ஏவுதலை நிகழ்த்திய முதல் தனியார் நிறுவனம் என்ற பெருமையை ஸ்கைரூட் பெற்றுள்ளதாகவும், இந்த வெற்றி இந்தியாவின் தனியார் விண்வெளி சூழலுக்கு முக்கிய மைல்கல்லாகவும், உலக அளவில் இந்தியாவின் நிலையை வலுப்படுத்தும் வகையிலும் அமையும் என்றும் அவர் தெரிவித்தார்.
