செயற்கை நுண்ணறிவு (ஏ.ஐ.) நிர்வாகத்தை மையமாகக் கொண்டு சீனா புதிய சர்வதேச அமைப்பை தொடங்கியுள்ளது. இதில் 29 நாடுகள் ஒப்பந்தத்தில் கையெழுத்திட்டுள்ள நிலையில், இந்தியா இந்த முயற்சியில் இணையாமல் விலகி நின்றுள்ளது.
‘டபிள்யூ.ஏ.ஐ.சி.ஓ.’ (World AI Cooperation Organization) என பெயரிடப்பட்ட இந்த அமைப்பை சீன அதிபர் ஷீ ஜின்பிங் தொடங்கி வைத்தார். நிகழ்வில் ஐ.நா. பொதுச் செயலர் அந்தோனியோ குட்டரெஸ் கலந்து கொண்டார். இந்த அமைப்பு ஷாங்காயை தலைமையிடமாகக் கொண்டு செயல்பட உள்ளது.
உலகளாவிய ஏ.ஐ. நிர்வாகத்தில் மேற்கத்திய நாடுகளின் ஆதிக்கத்திற்கு சீனா விடுக்கும் நேரடி சவாலாக இந்த கட்டமைப்பு பார்க்கப்படுகிறது. ரஷ்யா, பாகிஸ்தான் உள்ளிட்ட நாடுகள் கையெழுத்திட்டுள்ளதுடன், 10 ஆப்ரிக்க நாடுகள் மற்றும் 12 ஆசிய நாடுகளும் இதில் இடம்பெற்றுள்ளன.
‘பிரிக்ஸ்’ அமைப்பில் உள்ள இந்தியாவைத் தவிர மற்ற அனைத்து உறுப்புநாடுகளும் இந்த புதிய கூட்டமைப்பில் சேர்ந்துள்ளதாக தகவல்கள் கூறுகின்றன. மேலும், அமெரிக்கா தலைமையிலான ‘பாக்ஸ் சிலிகா’ தொழில்நுட்ப கூட்டமைப்பில் இந்தியா ஏற்கனவே உறுப்பினராக இருப்பதும்—அதில் அமெரிக்கா, பிரிட்டன், ஆஸ்திரேலியா, பிலிப்பைன்ஸ், இஸ்ரேல் போன்ற நாடுகள் உள்ளதும்—இந்த முடிவுக்கான காரணங்களில் ஒன்றாக குறிப்பிடப்படுகிறது.
இதனுடன், தன் சொந்த திறன்களை வளர்த்துக்கொள்ளும் முயற்சியிலும் இந்தியா கவனம் செலுத்தி வருவதால், சீனா தலைமையிலான ஏ.ஐ. நிர்வாக அமைப்பில் இணைவதைத் தவிர்த்ததாகவும் கூறப்படுகிறது.
