உக்ரைனின் ஒடீஸா துறைமுகத்தில் சரக்கு கப்பல் மீது நடத்தப்பட்ட தாக்குதலில் 4 இந்தியர்கள் உயிரிழந்ததாகவும், ஒருவர் கடுமையாக காயமடைந்ததாகவும் மத்திய அரசு தரப்பில் தெரிவிக்கப்பட்டுள்ளது.
ரஷ்யா–உக்ரைன் போர் கடந்த சில ஆண்டுகளாக நீடித்து வரும் நிலையில், சமீப நாட்களில் அதன் தீவிரம் அதிகரித்துள்ளதாக கூறப்படுகிறது. இந்தச் சூழலில், கயானா–பிசாவு பதிவுடைய எம்வி கோல்டன் லியோ என்ற சரக்கு கப்பல் ஜூலை 19 அன்று ஒடீஸா துறைமுகத்திலிருந்து புறப்பட்டதாக தகவல் வெளியாகியுள்ளது.
அந்த கப்பலில் மொத்தம் 17 மாலுமிகள் இருந்ததாகவும், அவர்களில் 5 பேர் இந்தியர்கள் எனவும் தெரிவிக்கப்பட்டுள்ளது. ரஷ்யா நடத்தியதாக கூறப்படும் தாக்குதலில் 4 இந்தியர்கள் உயிரிழந்தனர்; ஒருவர் உயிருக்கு ஆபத்தான நிலையில் சிகிச்சை பெற்று வருகிறார்.
இந்தச் சம்பவத்திற்கு மத்திய அரசு கண்டனம் தெரிவித்துள்ளது. மேலும், உக்ரைனில் உள்ள இந்தியத் தூதரக அதிகாரிகள் அந்நாட்டு அதிகாரிகளுடன் தொடர்பில் இருந்து, பாதிக்கப்பட்டவர்களுக்கு தேவையான உதவிகளை வழங்கி வருவதாகவும் தெரிவித்துள்ளது.
