பிரபல இசையமைப்பாளர் ஹாரிஸ் ஜெயராஜின் மனைவி சுமா ஹாரிஸ், மனைவி, அம்மா, நண்பர் என்ற அடையாளங்களைத் தாண்டி தனக்கென ஒரு தனி அடையாளம் வேண்டும் என்ற எண்ணம் பல ஆண்டுகளாக இருந்ததாக கூறுகிறார். அதனாலேயே, தாயின் பெயரை நினைவுகூர்ந்து ‘லீலாவதி’ என்ற பெயரில் சென்னை நுங்கம்பாக்கத்தில் புடவைக் கடையை தொடங்கியதாக அவர் தெரிவிக்கிறார்.
இந்த முயற்சியில் கணவர் எந்த விஷயத்திலும் தன்னை நச்சரிக்க மாட்டார் என்றும், தொழில் தொடங்கப் போவதை கூட முன்கூட்டியே அவரிடம் சொல்லவில்லை என்றும் சுமா கூறுகிறார். தொடங்கிய பிறகு ஒருநாள் அவர் கேள்விப்பட்டு, ஆச்சரியமாக “அப்படியா…” என்று கேட்டதோடு முடிந்ததாகவும் அவர் பகிர்கிறார்.
கடை எல்லா பெண்களுக்குமானதாக இருக்க வேண்டும் என்பதில் தொடக்கத்திலிருந்தே உறுதியாக இருந்ததாக சுமா கூறுகிறார். விலை குறைவாக இருப்பதால் தரம் குறைவாக இருக்கும் என்று நினைக்க வேண்டாம் என்றும், தன்னுக்கு பிடித்தால் மட்டுமே ஒவ்வொரு புடவையும் கடைக்கு கொண்டு வருவேன் என்றும் அவர் சொல்கிறார்.
ஒரு புடவையை தேர்வு செய்யும்போது “நான் இதை கட்டுவேனா?” என்று யோசித்த பிறகே வாங்குவதாகவும், நெசவாளர்களின் வாழ்வாதாரம் பாதிக்கப்படக் கூடாது என்பதால் கைத்தறி நெசவை ஊக்கப்படுத்துவதாகவும் அவர் தெரிவிக்கிறார். தற்போது சிறிய அளவில் தொடங்கியுள்ள நிலையில், மேலும் நேரம் ஒதுக்கி இதை பெரிதாக்குவது அடுத்த திட்டம் எனவும் கூறுகிறார்.
மேலும், சினிமா துறையினர், மருத்துவர்கள், பெண் தொழில் முனைவோர் உள்ளிட்ட நண்பர்கள் குழுவை தன் இன்னொரு குடும்பமாகவே பார்க்கிறேன் என்றும் சுமா கூறுகிறார். பிறந்த நாள், திருமண நாள், வளைகாப்பு போன்ற நிகழ்வுகள் வந்தால் யாராவது ஒருவர் வீட்டில் அனைவரும் ஒன்று கூடுவது வழக்கம் என்றும், ஒவ்வொருவரும் வீட்டில் செய்த சிறப்பு உணவுகளை கொண்டு வந்து மகிழ்ச்சியாக கொண்டாடுவோம் என்றும் அவர் கூறுகிறார்.
