சென்னை: முன்னாள் அ.தி.மு.க. அமைச்சர் எஸ்.பி. வேலுமணி தொடர்பான வழக்கு கோப்புகள் சுமார் ஐந்து மாதங்களாக நிலுவையில் வைக்கப்பட்டதற்கான காரணத்தை விளக்குமாறு, ஓய்வுபெற்ற ஐ.ஏ.எஸ். அதிகாரி காணொலி வழியாக ஆஜராக வேண்டும் என சென்னை உயர் நீதிமன்றம் உத்தரவிட்டுள்ளது.
அ.தி.மு.க. ஆட்சிக் காலத்தில் உள்ளாட்சித் துறை அமைச்சராக இருந்த வேலுமணி மீது, சென்னை மற்றும் கோவை மாநகராட்சிகளில் சாலைப் பணிகளுக்கான டெண்டர்கள் உறவினர்கள் மற்றும் நெருக்கமானவர்களுக்கு வழங்கப்பட்டதில் ரூ.98.25 கோடி அளவுக்கு முறைகேடு நடந்ததாக புகார் அளிக்கப்பட்டது. இதன் அடிப்படையில் லஞ்ச ஒழிப்புத் துறை (DVAC) வேலுமணி உள்ளிட்டோருக்கு எதிராக வழக்குப் பதிவு செய்தது.
இந்த வழக்கில் குற்றப்பத்திரிக்கை தாக்கல் செய்ய நீதிமன்றம் பிறப்பித்த உத்தரவை அமல்படுத்தவில்லை எனக் கூறி, லஞ்ச ஒழிப்புத் துறைக்கு எதிராக அறப்போர் இயக்கம் சார்பில் நீதிமன்ற அவமதிப்பு மனு தாக்கல் செய்யப்பட்டது. இந்த மனு நீதிபதி என். ஆனந்த் வெங்கடேஷ் முன் விசாரணைக்கு வந்தது.
விசாரணையில், லஞ்ச ஒழிப்புத் துறை தரப்பில் ஆஜரான வழக்கறிஞர் அருண் அன்புமணி, வழக்கில் குற்றம் சாட்டப்பட்டுள்ள இரண்டு ஐ.ஏ.எஸ். அதிகாரிகளுக்கு எதிராக வழக்கு தொடர மத்திய அரசின் அனுமதி கோரப்பட்டதாகவும், மத்திய அரசு கேட்ட விளக்கங்களுக்கு பதிலளித்து பிப்ரவரி 27 அன்று பொதுத்துறை செயலருக்கு கடிதம் அனுப்பப்பட்டதாகவும் தெரிவித்தார்.
இதையடுத்து, பிப்ரவரி 27 முதல் பொதுத்துறையில் இந்த விவகாரம் நிலுவையில் இருப்பதாகவும், அதற்கான விளக்கம் எதுவும் இல்லை என்றும் நீதிபதி குறிப்பிட்டார். அப்போது பொதுத்துறை செயலராக இருந்த ஓய்வுபெற்ற ஐ.ஏ.எஸ். அதிகாரி ரீட்டா ஹரிஷ் தாக்கர் காணொலி வழியாக ஆஜராகி விளக்கம் அளிக்க உத்தரவிட்டார். மேலும், தற்போதைய பொதுத்துறை செயலரும் மனு தாக்கல் செய்ய வேண்டும் என கூறி, விசாரணையை ஆகஸ்ட் 3க்கு ஒத்திவைத்தார்; தேர்தல் அல்லது ஆட்சி மாற்றம் போன்ற காரணங்களை ஏற்க முடியாது என்றும், பல உத்தரவுகளுக்குப் பிறகும் முன்னேற்றம் இல்லாததைப் பற்றி அதிருப்தியும் தெரிவித்தார்.
